Փաշինյանն ու թիմն արեցին հեղափոխություն, դրանով իրենց առաքելությունն ավարտվել է, այլևս անելիք չունեն․ Գևորգ Գորգիսյան. ՏԵՍԱՆՅՈՒԹ. ՏԵՍԱՆՅՈՒԹ

Factor.am-ի հարցազրույցն ԱԺ «Լուսավոր Հայաստան» խմբակցության քարտուղար Գևորգ Գորգիսյանի հետ

-Պարոն Գորգիսյան, այսօր Արցախի անկախության հռչակագրի ընդունման օրն է։ Արդեն իսկ խորհրդարանից պատվիրակություն է մեկնել՝ մասնակցելու այդ կարևոր միջոցառմանը։ Որքանով տեղյակ եմ՝ «Լուսավոր Հայաստան»-ը չի հրավիրվել։ Ինչո՞ւ։

-Նախ շնորհավորեմ ամբողջ հայությանն անկախության ընդունման և դրանից բխող բոլոր հաղթանակների համար։ Արցախին և բոլորիս, ովքեր իրենց համարում են Արցախի զինվոր՝ ուժ, եռանդ, կորով, որպեսզի մենք բոլորով կարողանանք Արցախի հարցը ճիշտ, հայանպաստ լուծման բերել։ Գիտեք, մենք մի արատավոր երևույթի ենք ականատես դառնում, երբ նոր իշխանությունները, հեղափոխությամբ, ժողովրդի ձայնով, կարծես թե, իշխանության եկած մարդիկ սկսել են իրենց նույնականացնել պետության հետ։ Եվ սա դրա վառ ապացույցն է, թե պետությունն իրենք են։ Երբ հուլիսյան դեպքերը եղան, մենք չնայեցինք՝ ով է իշխանություն, ով՝ ընդդիմություն, և մեր բոլոր լծակներն օգտագործում էինք, որպեսզի աշխարհին ներկայացնենք, որ Ադրբեջանը դիմել է սադրանքի։ Բայց երբ գալիս է հաղթանակները նշելու ժամանակը՝ դա միայն իշխանության հաղթանակն է։

-Ընդդիմադիր դաշտում, կարծես թե, համախմբում է տեղի ունենում։ ԲՀԿ ղեկավարն էլ կառավարության փոփոխության մասին էր խոսում։ Դրա հնարավորությունը տեսնո՞ւմ եք։

-Դեռևս չկա այն հանրային պահանջը, որ Նիկոլ Փաշինյանը պետք է հեռանա իշխանությունից։ Իհարկե, շատ են դժգոհությունները տարբեր նախարարներից, բայց Փաշինյանի թիմը պրոպագանդայի բոլոր մեթոդներով կարողացել է հասնել նրան, որ հանրության մի մասը նույն բառերով ասում է՝ դե, 30 տարվա քանդածը 2 տարում չես կառուցի։ Այսպիսի միֆերով իշխանությունը փորձում է իր ապիկարությունն արդարացնել։ Փաշինյանն ու թիմն արեցին հեղափոխություն, դրանով իրենց միսիան ավարտվել է, այլևս անելիք չունեն։ Նրանք կառուցողներ չեն և ամեն օր ցույց են տալիս դա։

-ԲՀԿ ղեկավարի հանրահավաքին կմիանա՞ք, թե ոչ։

-ԲՀԿ-ից առաջարկ չենք ստացել՝ միանալու հանրահավաքին։ Եթե լինի՝ անպայման կքննարկենք։ Բայց ես վստահ չեմ, որ այդ հանրահավաքը Նիկոլ Փաշինյանի հրաժարականի մասին է։ Կարծեմ՝ Արայիկ Հարությունյանի հրաժարականի մասին է, մամուլից այդպես եմ տեղեկացել։

Հարցազրույցն ամբողջությամբ՝ տեսանյութում:

Մերի Մարտիրոսյան