19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Դասի՝ միայն դիմակներով․ Սեպտեմբերի 1-ը Գյումրիի բուհերում մեկնարկեց «արտակարգ» պայմաններում․ ԼՈՒՍԱՆԿԱՐՆԵՐ
Հասարակություն
01.09.2020 | 16:01
Այսօր մեկնարկում է նոր ուսումնական տարին։ Կորոնավիրուսի համավարակով պայմանավորված՝այս տարի սեպտեմբերի 1-ին միայն բուհերն են բացել իրենց դռները, այն էլ՝ միայն առաջին կուրսեցիների համար։ Պարետի սահմանած կանոններին համապատասխան էլ Գյումրիի բուհերն այսօր ընդունեցին առաջին կուրսեցիներին․ մուտքը՝ դիմակներով ու պարտադիր ջերմաչափմամբ։
Կորոնավիրուսային տրամադրությունները մեղմելու և ուսանողների ուսումնական առաջին օրը փոքր-ինչ հիշարժան դարձնելու համար բուհերը փորձել էին տոնական միջոցառում կազմակերպել։ Մասնավորապես, առաջին կուրսեցիների համար տոնական ընդունելություն ու միջոցառում էր կազմակերպվել ՀՊՏՀ Գյումրու մասնաճյուղի բակում։
Այս տարի բուհ ընդունվել է 91 ուսանող, իսկ նրանց մի մասն արդեն մեկնել է զինծառայության։ Ընդհանուր առմամբ, դասերի կհաճախի մոտ 80 ուսանող։
Factor.am-ի հետ զրույցում ՀՊՏՀ Գյումրու մասնաճյուղի տնօրեն Կարեն Պետրոսյանն ասաց, որ բուհում հետևում են հակահամաճարակային բոլոր կանոններին, սահմանված կանոնների շրջանակում էլ կազմակերպվում է ուսումնական պրոցեսը։
«Պայմաններից և՛ դժգոհողներ կան, և՛ զգուշավոր ուսանողներ։ Բայց ուսանողը այն խավն է, որը հակված է կանոններ չպահել։ Եվ մեր գործն այս առումով ավելի բարդ է, որ հետամուտ լինենք, որպեսզի հետևեն կանոներին։ Վերջնական գնահատական կարելի է տալ արդեն դասապրոցեսի ժամանակ»,- ասաց Կարեն Պետրոսյանը։
Շիրակի մայր բուհն էլ այսօր իր 320 առաջին կուրսեցիներին է ընդունել։ Այստեղ ևս ուսումնական գործընթացը կազմակերպվում է հակահամաճարակային կանոններին համապատասխան։ Լսարանները կահավորված են՝ պահպանվում է 1․5 մետր սոցիալական հեռավորությունը, ջերմաչափում է իրականացվում, փակ աղբամանները տեղադրված են, ախտահանող հեղուկները՝ նույնպես, սանիտարահիգիենիկ կանոնները՝ պահպանված։ Կրճատվել է նաև դասաժամերի ու դասամիջոցի տևողությունը։
«Պատրաստ ենք նաև լսարանների ախտահանմանը։ Ավելին, որոշել ենք նաև, որ յուրաքանչյուր լսարանում ուսանողներն իրենց մշտական տեղն են ունենալու, որպեսզի ունենանք ուսանողների քարտեզը։ Եթե մեկի մոտ վարակ լինի, նրա անմիջական շրջապատն արագ կֆիքսենք, որ ամբողջ խումբը փորձության չենթարկվի՝ բոլորին թեստավորեն, որովհետև ամենամոտ շրջապատը նախ կպարզվի»,- ավելի վաղ մեզ հետ զրույցում ասել էր ՇՊՀ ռեկտորի պաշտոնակատար Երվանդ Սերոբյանը։
Նշենք, որ Գյումրիի բուհերում ևս ուսումնական գործընթացն իրականացվելու է հիբրիդային՝ առկա ու հեռավար տարբերակով։ Բարձր կուրսեցիների համար դասերը կմեկնարկեն սեպտեմբերի 15-ից։
Էմմա Չոբանյան
