Ալիևի իշխանությունը ռուսամետ է․ եթե հեռանա՝ Ադրբեջանում խիստ հակառուսական ռեժիմ կհաստատվի․ Արման Մելիքյան. ՏԵՍԱՆՅՈՒԹ

Factor.am-ի հարցազրույցը ՀՀ Արտակարգ և լիազոր դեսպան, ԼՂՀ նախկին արտգործնախարար Արման Մելիքյանի հետ

-Պարո՛ն Մելիքյան, երեկ պաշտոնական այցով Մոսվկվայում էր Ադրբեջանի նորանշանակ արտգործնախարար Ջեյհուն Բայրամովը։ Բանակցություններից հետո ասուլիս է կայացել, որտեղ ուշագրավ հայտարարություններ կան։ ՌԴ արտգործնախարարն ասել է՝ անընդունելի է Արցախի հարցով բանակցային կազմը փոխելու փորձերը։ Գիտենք, որ ՀՀ-ն է առաջ քաշում Արցախը բանակցություններում ներգրավելու հարցը, Թուրքիան էլ հավակնություն ունի համանախագահության կազմ ընդգրկվելու։ Դուք տեսա՞ք Լավրովի խոսքում փորձ՝ թիրախավորելու Հայաստանը՝ որպես պետություն, որը նպատակ ունի իրականություն դարձնել Արցախի վերադարձը բանակցությունների սեղան։

-Իհարկե, կարելի է նման բան տեսնել, դրանից պետք չէ վախենալ։ Պետք է հաշվի առնենք հետևյալը, որ ադրբեջանցի նախարարն առաջին անգամ էր պաշտոնական այցով Մոսկվայում։ Նկատենք, որ Մոսկվան շահագրգիռ է իր ազդեցությունը պահպանելու ինչպես Ադրբեջանում, այնպես էլ Հայաստանի Հանրապետությունում և Արցախի Հանրապետությունում։ Ուստի, նա կարող է որոշակի ռևերանսների դիմել՝ ադրբեջանական կողմի պաշտոնեական փոփոխությանն աջակցելու տպավորություն ստեղծելու համար։ Մենք պետք չէ, որ դա անտեսենք և պետք է հասկանանք, թե որքանով դա կարող է լուրջ լինել։ Ընդհանուր առմամբ, դատելով՝ պարոն Լավրովի պահվածքից, պաշտոնական Մոսկվան շահագրգռված է բանակցությունների վերսկսկմամբ, բայց ամենևին հույս չունի, թե այդ բանակցությունները կարող են առարկայական բնույթ ձեռք բերել և իրական արդյունքի հանգեցնել խաղաղ կարգավորման տեսանկյունից առաջիկա տարիների ընթացքում։ Ես կարծում եմ, որ ռուսական կողմը փորձում է պահպանել իր ազդեցությունը, ներուժը Հարավային Կովկասում՝ թե՛ Բաքվի, թե՛ Երևանի հետ բալանսավորված հարաբերություններ կառուցելով, նաև՝ օգտագործելով հակամարտության առկայությունը։

-Արցախի հարցում Ռուսաստանը ցույց է տալիս նախաձեռնողականություն։ Մինչև Թավշյա հեղափոխությունը, կարելի է ասել՝ ավանդական էին դարձել Հայաստանի և Ադրբեջանի նախագահների ու Պուտինի մասնակցությամբ հանդիպումները ՌԴ-ում։ Պետք է խնդրեմ գնահատեք ՌԴ-ի իրական հավակնությունները և նպատակը Արցախի հարցում։ Դուք նշում եք՝ փորձում է ազդեցությունը պահպանել երկու կողմի վրա, կարևո՞ր է նրա համար Արցախի հարցումը։

-Անուշտ կարևոր է, բայց այն պայմաններով, որ կապահովվի Ռուսաստանի ռազմաքաղաքկան ազդեցությունը Հարավային Կովկասում։ Մենք պետք է ելնենք այն հանգամանքից, որ ալիևյան ընտանիքի իշխանությունն Ադրբեջանում ռուսամետ իշխանություն է, և եթե այդ ընտանիքը հեռանա իշխանությունից, վստահ եմ, որ Ադրբեջանում խիստ հակառուսական ռեժիմ կհաստատվի՝ ազգայնական, գուցե՝ կրոնական ելևէջներով, բայց խիստ հակառուսական։ Ալիևներն իրենց քաղաքականությամբ ռուսամետությունը կամ ռուսամետության տպավորությունը պահպանում են, և այդ առումով նրանք նրանք շատ կարևոր են Մոսկվայի համար, ինչքան ասենք՝ Նազարբաևը Ղազախստանում, կամ Ուզբեկստանի ու Ղրղզստանի իշխանությունները։ Դրանք բոլորը թյուրքախոս պետություններ են, որոնցում Թուրքիայի ազդեցությունը վերջին 20 տարիներին էապես աճել է և այնտեղ իշխող կլանները, կապված լինելով Ռուսաստանի հետ, ստիպված են հաշվի նստել իրենց բնակիչների ազգայնական տրամադրությունների հետ։

Մանրամասները՝ տեսանյութում:

Ռոբերտ Անանյան