Շիրակի մարզպետարանի հրապարակած տվյալների համաձայն՝ մարզում կորոնավիրուսից մահվան 39 դեպք է արձանագրվել։ Մահվան վերջին դեպքը բուժաշխատողների շրջանում է գրանցվել։ Կրտսեր բուժաշխատող է մահացել։ Այս մասին մեզ հետ զրույցում հայտնեց Շիրակի մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար Լեյլի Ասլանյանը։
«Գյումրիից է մահացածը, կրստեր բուժաշխատող է, սանիտար է։ Տեղափոխվել է Երևան, այնտեղ է մահացել»,- ասաց Լեյլի Ասլանյանը։ Նա նշեց, որ Շիրակի մարզում բուժաշխատողների շրջանում սա մահվան առաջին դեպքն է, մահացածն էլ ունեցել է նաև ուղեկցող հիվանդություններ։
Հիշեցնենք, որ ավելի վաղ կորոնավիրուսից մահվան դեպքեր մի ընտանիքում էին գրանցվել․ մահացել էին մայրն ու նրա 30-ամյա որդին։
Նախորդ օրերի համեմատ էլ մարզում վարակվածների թվի փոքր ավելացում կա։ Օգոստոսի 25-ի ժամը 11.30-ի դրությամբ Գյումրու ինֆեկցիոն հիվանդանոցում կորոնավիրուսով Շիրակի մարզի 41 բնակիչ է բուժվում։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 9332 նմուշառում, որից 2978-ը Շիրակի մարզում: Օգոստոսի 24-ին հաստատվել է կորոնավիրուսային հիվանդության 24 նոր դեպք։ Մարզում այսօրվա դրությամբ տնային ինքնամեկուսացման ցուցում ունի 517 քաղաքացի, նրանցից 101-ի մոտ դրական ախտորոշում կա՝ հիվանդության անախտանիշ ընթացքով, հսկողությունն իրականացվում է առողջության առաջնային օղակի կողմից։
Նշենք, որ Գյումրիում կորոնավիրուսի նոր բռնկում էր գրանցվել «Երեխաների տուն» մանկատանը։ Կորոնավիրուսով են վարակվել 6 երեխա ու 7 աշխատակից։ Լեյլի Ասլանյանի խոսքով՝ հիվադների վիճակը կայուն է, մարզում էլ վարակի բռնկման նոր օջախ չկա։ Ըստ պատասխանատուի՝ մարզում, ընդհանուր առմամբ, կորոնավիրուսային իրավիճակը կայուն է։
Հավելենք, որ կորոնավիրուսից առողջացել և Գյումրու ինֆեկցիոն հիվանդանոցից մինչ օրս դուրս է գրվել Շիրակի մարզի 529 բնակիչ։
Էմմա Չոբանյան
