«Շինարարական կազմակերպությունից ասեցին՝ ինչ կուզենք կանենք»․ բնակիչները կանաչ տարածություն են ուզում. ՏԵՍԱՆՅՈՒԹ

Երևանի Աղբյուր Սերոբի 7 հասցեի բնակիչներն այսօր փակել էին ճանապարհը՝ իրենց բողոքն արտահայտելու հարևանությամբ բարձրահարկ շենք կառուցելու որոշման դեմ։

Ըստ բնակիչների՝ շինարարության որոշումը կայացվել է առանց հանրային քննարկումների, և տարածքի բնակիչները դեմ են, որպեսզի մի քանի մետր հեռավորության վրա նոր բարձրահարկ շենք կառուցվի․ «Մենք շատ նամակներ ենք ուղարկել թաղապետարան, քաղաքապետարան, փորձել ենք հասկանալ՝ ինչ է կատարվում այստեղ, ոչ մի պատասխան դեռ չենք ստացել։ 170 ստորագրություն ենք հավաքել ամբողջ այս տարածքից։ Այստեղ խնդիրն այն է, որ մենք չգիտենք՝ նման խտության տարածքում կարելի՞ է բարձրահարկ շենք կառուցել։ Այսօր առավոտյան մենք որոշակի ժամանակով նորից փակեցինք փողոցը, սպասում ենք պետական պաշտոնյաներին, կամ թույլտվություն տվողը  թող գա մեզ բացատրի վերջապես՝ այստեղ ինչ է տեղի ունենում, բայց դրա փոխարեն ժամանեցին ոստիկանները՝ շուրջ 20-25 ոստիկան, բնակիչներից մի քիչ էին քիչ»,- լրագրողների հետ զրույցում հայտնեց «Ռեստարտ» նախաձեռնության անդամ Դավիթ Պետրոսյանը։

Վերջինիս խոսքով՝ շինարարական կազմակերպությունից ևս ոչ մի պատասխան չեն ստացել․ «Շինարարական կազմակերպությունից առաջին օրը մեր հարցերին ի պատասխան ասացին՝ մենք ինչ կուզենք, կարանք անենք, մենք թույլտվություն ունենք։ Ասացինք՝ հնարավո՞ր է այդ թույլտվությունը տեսնենք, ասացին՝ չէ։ Իրենց նպատակն ուղղակի արագ քանդելն է, բայց բնակիչների հետ ոչ մի բանակցության չեն մտել, բնակիչների կարծիքը չեն հարցրել»,- նշեց Պետրսյանը։

Մանրամասները՝ տեսանյութում։