16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
7 հատ սիգը վաճառվում է 1000 դրամով․ սա ազգային հարստության մսխում է․ նախարար. ՏԵՍԱՆՅՈՒԹ
Տնտեսություն
19.08.2020 | 18:57
Այսուհետ Սևանա լճից յուրաքանչյուր որսված ձկան քաշը պետք է լինի 0,5 կիլոգրամ և ավելի։ Այս մասին այսօր ուղիղ եթերի ընթացքում հայտարարեց Շրջակա միջավայրի նախարար Ռոմանոս Պետրոսյանը՝ տեղեկացնելով, որ վաղ առավոտից մեկնարկելու է արդյունագործական ձկնորսության նոր կարգի գործադրումը։
«Այսօր ինքներդ եք ականատես այն վիճակին, որ ունենք շուկաներում, վաճառքի կետերում, փողոցներում, մայթեզրերին, երբ 4, 5 շատ դեպքերում մինչև 7 հատ սիգը վաճառվում է ընդամենը 1000 դրամով։ Դա ազգային հարստության անպատասխանատու մսխում է մեր սերնդի որոշ ներկայացուցիչների կողմից, իրենց արտոնյակ համարող որոշ շրջանակների թողտվության և հովանավորչության պարագայում»,- նշեց Պետրոսյանը։
Նախարարը կոչ արեց քաղաքացիներին համախմբվելու՝ հանուն Սևանի փրկության․ «Կոչ եմ անում մեր բոլոր իրավագիտակից քաղաքացիներին շուկաներից, փողոցներից, առևտրի սրահներից որևէ դեպքում կես կիլոգրամից ցածր մանրաձուկ չգնել։ Տվյալ պարագայում ահազանգել ոստիկանություն, ինչպես նաև մեր գերատեսչության թեժ գծերով։ Ամենակարճ ժամկետներում նվազեցնելով այդ մանրաձկան պահանջարկը, ես վստահ եմ, որ որոշ անբարեխիղճ ձկնորսներ նաև զերծ կմնան մանրաձուկ որսալուց, այդպիսով նաև մանրաձկան որսից սպառնացող սիգի պոպուլյացիայի անհետացման վտանգը կչեզոքացվի»,- նշեց նախարարը։
Վերջինիս խոսքով՝ ապօրինի ձկնորսությունը ոչ մի դեպքում չեն հանդուրժելու և կիրառելու են համապատասխան միջոցներ․ «Այս փուլի համար մինչև հոկտեմբեր մենք սահմանաչափ ենք սահմանել 200 տոննա թույլատրելի քանակը, և արդեն Շրջակա միջավայրի նախարարության հետ պայմանագրեր են կնքել շուրջ 110 տնտեսվարողներ։ Ընդհանուր սահմանաչափը հասել է շուրջ 150 տոննայի։ Այսինքն՝ նույնիսկ կառավարության որոշմամբ սահմանված 200 տոննա պաշարը, որը թույլատրելիի մեջ է 0,5 կիլոգրամ և ավելի ձկնապաշարի որսի համար, չի լրացել։ Եվս 50 տոննայի լիմիտ ունենք։ Եթե կլինեն շրջանակներ, ովքեր ուշացել են այս գործընթացից, մենք կարող ենք քննարկել, որ կառավարությանը միջնորդեմ, որ հավելյալ քվոտաներ իջեցնեն նաև նոր շրջանակների համար։ Բայց ուզում եմ հիշեցնել, որ որևէ դեպքում չենք հանդուրժելու ապօրինի ձկնորսությունը, արգելված ձկնատեսակների, ձկնաչափերի որսը Սևանա լճում և իհարկե սահմանված նորմերի շրջանցումը»,- եզրափակեց նախարարը։
Մանրամասները՝ տեսանյութում։
