Հասարակություն
18.08.2020 | 15:32
Մաքուր օդ և ջուր ունենալու ակնկալիքով Գեղամասար խոշորացված համայնքի մոտ 200 բնակիչները առավոտյան ժամը 7։00-ին փակել էին Վարդենիս- Քարվաճառ միջպետական ճանապարհը։
Ըստ ակցիայի մասնակիցների՝ Սոթքի ոսկու հանքի պայթեցման հետևանքով առաջանում է քիմիական տարրերով հարուստ փոշու ամպ, որը հասնում է շրջակա բնակավայրեր, աղտոտում է նաև խմելու և ոռոգման ջրերը։ Ակցիայի մասնակիցներից Սևակ Խաչատրյանը, որը Սոթք համայնքի բնակիչ է, Factor.am-ի հետ զրույցում նշեց, որ իրենց հիմնական պահանջը մեկն է՝ օդի և ջրի աղտոտվածության խնդրի կարգավորումը. «Դա տեղի է ունենում հանքի ոչ նորմալ շահագործման հետևանքով։ Հավաքվել էին Գեղամասար խոշորացված համայնքի բնակիչները, հիմնականում Սոթք համայնքի բնակիչներն են եղել»։
Նրա խոսքով՝ 8։30-իսահմններում ճանապարհը բացվել է: «Հեռախոսային խոսակցության միջոցով պայմանավորվածություն է ձեռք բերվել հանքի ղեկավարության հետ հանդիպում կազմակերպելու և խնդրի լուծումների շուրջ քննարկում ունենալու վերաբերյալ։ Պայմանավորվածությունից հետո բացեցինք ճանապարհը»,- նշեց բնակիչը։
Համայնքի բնակիչների և հանքը շահագործող «ԳեոՊրոՄայնինգ» ընկերության ղեկավարության հանդիպումը, ըստ պայմանավորվածության, տեղի կունենա այսօր կամ վաղը։
Անժելա Պողոսյան
