07.07.2026 | 01:01
ԱԱ-2026. Իսպանիան հաղթանակ կորզեց Պորտուգալիայի դեմ խաղում. ՏԵՍԱՆՅՈՒԹ
Novavax-ը Հարավային Աֆրիկայում սկսել է իր պատվաստանյութի միջանկյալ փուլի ուսումնասիրությունը
Քաղաքականություն
18.08.2020 | 11:11
ԱՄՆ-ի «Novavax Inc»-ը (NVAX.O), որը զբաղվում է կորոնավիրուսային պատվաստանյութի ստեղծման աշխատանքներով, նախօրեին հայտարարել է, որ Հարավային Աֆրիկայում սկսել է իր փորձնական պատվաստանյութի միջանկյալ փուլի ուսումնասիրությունը, հայտնում է Reuters-ը:
Երկրի ընտրությունը պայմանավորված է այն հանգամանքով, որ Հարավային Աֆրիկայում նկատվում է կորոնավիրուսային դեպքերի աճ:
Հարավային Աֆրիկան կորոնավիրուսից ամենաշատ տուժած երկրների թվում հինգերորդ տեղն է զբաղեցնում: Երկրում գրանցվել է 583,653 դեպք և 11,677 մահ:
«Քանի որ Հարավային Աֆրիկայում նկատվում է Covid-19-ի նոր դեպքերի սեզոնային աճ, կլինիկական փորձարկումների այս փուլը տալիս է պատվաստանյութի արդյունավետությունը վաղ բացահայտելու հնարավորություն»,-ասել է Novavax ընկերության հետազոտական խմբի ղեկավար Գրեգորի Գլենը:
Novavax-ի NVX-CoV2373 անվամբ պատվաստանյութի փորձարկումներին, որի համար Bill & Melinda Gates («Բիլլ և Մելինդա Գեյթս») հիմնադրամը հատկացրել է 15 մլն դոլար, մասնակցում է մարդկանց երկու տարբեր խումբ: Առաջին խմբում ընդգրկված են 2,665 կամավորներ, իսկ երկրորդում՝ ՄԻԱՎ-դրական անձինք:
Novavax-ը հույս ունի, որ հավանության արժանանալուց հետո իր պատվաստանյութը կտրամադրվի Հարավային Աֆրիկային՝ այս տարվա սկզբին Հնդկաստանի Սերում ինստիտուտի հետ կնքված գործարքի համաձայն:
NVX-CoV2373-ը շուրջ 30 պատվաստանյութերից մեկն է, որոնք գտնվում են կլինիկական փորձարկումների փուլում:
Պատվաստանյութի փոքրիկ կլինիկական փորձարկումից ստացված տվյալները վկայում են, որ այն արտադրում է վիրուսների դեմ պայքարող հակամարմինների բարձր մակարդակ, և ընկերությունը նպատակ ունի սկսել ավելի մեծ ուսումնասիրություններ՝ դեկտեմբերի սկզբին կարգավորող հաստատումներ ստանալու համար:
Novavax-ը մտադիր է մոտ ապագայում սկսել կլինիկական փորձարկումների 2-րդ փուլը Միացյալ Նահանգներում և Ավստրալիայում: Այդ փորձարկումներում կներգրավվեն 1500 կամավոր: Ընկերությունը նաև նպատակ ունի սկսել 3-րդ փուլի աշխատանքները սեպտեմբերի վերջին:
Հուլիսին ԱՄՆ կառավարությունը Novavax-ին հատկացրել էր 1,6 մլրդ դոլար՝ պատվաստանյութը փորձարկելու և մինչև հունվար 100 միլիոն դեղաչափ արտադրելու համար:
