Սամվել Ալեքսանյանը կրճատել է «Իմ քայլը» հիմնադրամին տրվող գումարները, իսկ Գագիկ Խաչատրյանի ընտանիքը՝ դադարեցրել նվիրատվությունները

ՀՀ վարչապետի տիկին Աննա Հակոբյանի ղեկավարած «Իմ քայլը» բարեգործական հիմնադրամի այս տարվա մուտքերը կազմում են 250 մլն դրամ, 280 հազար ԱՄՆ դոլար, 700 հազար ռուսական ռուբլի և 1,7 հազար եվրո: Այս մասին Factor.am-ը տեղեկանում է հիմնադրամի պաշտոնական mystep.foundation կայքից:

Հիմնադրամին ամենամեծ գումարը նվիրաբերել է ամերիկահայ գործարար Ջորջ Բաղումյանը: Նա «Իմ քայլը» հիմնադրամին փոխանցել է 200 հազար ԱՄՆ դոլար, որը համարժեք է 96,7 մլն դրամի:

Ի դեպ, Աննա Հակոբյանը տեղեկացրել էր, որ գործարարն այս գումարը նպատակային է փոխանցում՝ զինվորների համար: Հաջորդ ամենամեծ նվիրատուն «Վիտալի Գրիգորյանց» բարեգործական հիմնադրամն է՝ 45 մլն դրամ:

Նվիրատուների թվում է նաև «Նատալի Ֆարմ» ՍՊԸ-ն, որը փոխանցել է 10 մլն դրամ: Այս ընկերությունը պատկանում է ՀՀԿ խմբակցության նախկին պատգամավոր, գործարար Սամվել Ալեքսանյանին: Ի դեպ, նախորդ տարի Սամվել Ալեքսանյանն ավելի առատաձեռն է եղել հիմնադրամին գումարներ փոխանցելու հարցում: Օրինակ՝ նրան պատկանող «Երևան սիթի» սուպերմարկետների ցանցը 2019 թվականի ընթացքում փոխանցել է 34,5 մլն դրամ, իսկ «Ալեքս Հոլդինգ» ՍՊԸ-ն՝ 33,6 մլն դրամ:

Հանրապետական նախկին պատգամավորներից հիմնադրամին այս տարի 5 մլն դրամ է փոխանցել Արտակ Սարգսյանին պատկանող «ՍԱՍ Գրուպը»:

Մեկ միլիոն դրամ է փոխանցել ՀՀԿ խմբակցության նախկին պատգամավոր Ալեքսան Պետրոսյանի /ՄԱՊ-ի Ալիկ/ «ՄԱՊ» գինու գործարանը: Կես միլիոն դրամ էլ փոխանցել է Գյումրու քաղաքապետ Սամվել Բալասանյանի որդուն՝ Միսակ Բալասանյանին պատկանող «Գյումրի Գարեջուր» ընկերությունը:

Նախորդ տարիների նվիրատուների ցանկում եղել են նախկին քաղաքական շրջանակների հետ կապված անձինք, որոնք այս տարի վարչապետի տիկնոջ ղեկավարած հիմնադրամին նվիրատվություն չեն արել: Մասնավորապես, ֆինանսների նախկին սուպերնախարար Գագիկ Խաչատրյանի ընտանիքին պատկանող «Յուքոմ» ընկերությունը նախորդ տարի հիմնադրամին 15 մլն դրամ է փոխանցել: «ՖԼԵՇ» ՍՊԸ-ն, որը պատկանում է Սերժ Սարգսյանի ընկերեջը՝ Բարսեղ Բեգլարյանին (Ֆլեշի Բարսեղ), նախորդ տարի 5 մլն դրամ է նվիրաբերել: Վարդանյանների ընտանիքը, որը զբաղվում է քաղցրավենիքի և ծխախոտի արտադրությամբ, նախորդ տարի 5 միլիոն դրամ է փոխանցել:

Ի տարբերություն նախորդ տարիների, այս տարվա ցանկում չկա նաև Գագիկ Ծառուկյանի տիկինը՝ Ջավահիր Ծառուկյանը, նա 2018-ին 12 մլն դրամ էր նվիրաբերել հիմնադրամին: Նույն թվականին 6 մլն դրամ էլ նվիրաբերել էր Գագիկ Խաչատրյանի ընտանիքին պատկանող «Մեգասպորտ» ՍՊԸ-ն:

Նարեկ Կիրակոսյան