Հասարակություն
13.08.2020 | 11:59Այսօր Կառավարության հերթական նիստում ընդունվեց նախագիծ, որի համաձայն, 2003-2015 թթ. ընթացքում Հայաստանի մանկական խնամակալական կազմակերպությունների շրջանավարտներին հատկացված բնակելի տարածությունը կամ բնակարանները նվիրաբերվում են այդտեղ բնակվող մանկատան 163 շրջանավարտներին: Նախագիծը Կառավարության նիստում ներկայացրեց աշխատանքի և սոցիալական հարցերի նախարար Զարուհի Բաթոյանը:
Վարչապետ Նիկոլ Փաշինյանը հստակեցրեց․ «Ճի՞շտ եմ հասկանում, որ մինչև 2019 թվականը ներառյալ, մանկատների բոլոր շրջանավարտներին, որոնք չունեն բնակարան, ապահովում ենք բնակարանով: Այսինքն՝ այդ կատեգորիայի որևէ մարդ չի մնում առանց բնակարանի, ճի՞շտ է»։ Բաթոյանը դրական պատասխան տվեց. «Այո, բոլոր այն քաղաքացիները, որոնք շրջանավարտ են եղել 1991-ից 2019 թվականը, որոնք չունեն սեփականություն, կունենան բնակարան»:
Վարչապետը նշեց, որ միջնաժամկետ առումով շեշտը պետք է դրվի մանկատան սաների կրթության վրա, քանի որ միայն բնակարան հատկացնելը լուծում չէ: «Մեր խնդիրը չպետք է լինի, որ մանկատան սաներին բնակարան տանք։ Մեր խնդիրը այն պետք է լինի, որ մանկատան սաներին շրջանավարտ դառնալու պահին և հետագայում էլ կրթական այնպիսի հմտություններով կարողանանք օժտել, որ նրանք 1-2 տարի հնարավոր է վարձակալության փոխհատուցում ստանան, ապա իրենք իրենց աշխատանքով բնակարան ձեռք բերեն»,- նշեց վարչապետը։
Մանրամասները՝ տեսանյութում։
