07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Թուրքիայի ԱԳՆ -ն արձագանքել է Սևրի պայմանագրի 100-ամյակի առթիվ ՀՀ իշխանությունների հայտարարություններին
Քաղաքականություն
11.08.2020 | 15:51
Թուրքիայի ԱԳՆ-ն արձագանքել է Սևրի պայմանագրի 100-ամյակի առիթով Հայաստանի իշխանությունների հայտարարություններին։
«1920թ-ի օգոստոսի 10-ին կնքված Սևրի պայմանագիրը, որը Առաջին համաշխարհային պատերազմի վերջին ուղղված էր ոչնչացնելու մեր հայրենիքի անկախությունն ու ինքնիշխանությունը, հանդիսանում է մի փաստաթուղթ, որում բացահայտվեցին ներխուժման պլանները։ 1923թ-ի հուլիսի 24-ի Լոզանի խաղաղության պայմանագրի կնքումից հետո, թուրք ժողովուրդը պատռել է Սևրը և նետել պատմության աղբամանը։ Զարմանալի չէ, որ նրանք, որ դասերի փոխարեն թշնամանք են քաղում պատմությունից, դիմում են այս փաստաթղթին, չնայած անցել է մեկ դար»,- ասվում է Թուրքիայի ԱԳՆ-ի տարածած հայտարարության մեջ։
Թուրքական կողմը Հայաստանին նաև «մեղադրել է» ազգայնական քաղաքականություն վարելու մեջ։
Հիշեցնենք, որ նախօրեին ՀՀ վարչապետ Նիկոլ Փաշինյանը ուղերձ էր հղել Սևրի պայմանագրի ստորագրման 100-ամյակին նվիրված գիտաժողովի մասնակիցներին։ Վարչապետը նշել էր, որ Սևրի հաշտության պայմանագիրը նշանակալից տեղ է զբաղեցնում հայ ժողովրդի ժամանակակից պատմության մեջ:
«Չնայած Սևրի պայմանագիրն այդպես էլ կյանքի չկոչվեց, այն շարունակում է գոյություն ունենալ որպես պատմական փաստ, որն արտացոլում է անկախ պետականության վերականգնման համար անցած մեր ուղին: Մեր պարտքն է հիշել այն, գիտակցել և պահպանել նրա խորհուրդը»,- ասվում է վարչապետի ուղերձում։
Նախագահ Արմեն Սարգսյանն էլ սիրիական հեղինակավոր Ալ-Ազմենահ թերթին տված հարցազրույցում ասել էր, որ Սևրի հաշտության պայմանագիրն այսօր էլ մնում է որպես կարևոր փաստաթուղթ՝ Հայկական հարցի արդարացի լուծման հասնելու հայ ժողովրդի իրավունքի մասին։
Էմմա Չոբանյան
