15.03.2026 | 21:36
Իրանում ձերբակալել են ավելի քան 30 մարդու՝ Իսրայելին տեղեկատվություն փոխանցելու կասկածանքով
Բելառուսում բախումները շարունակվել են այս գիշեր. ցուցարար է մահացել
Քաղաքականություն
11.08.2020 | 10:04
Բելառուսի մայրաքաղաք Մինսկում ոստիկաններն այս գիշեր նույնպես ցուցարարների ուղղությամբ ռետինե փամփուշտներ և արցունքաբեր գազ են արձակել՝ կիրակի օրը տեղի ունեցած նախագահական ընտրություններից հետո շարունակվող բողոքի ցույցերը ցրելու համար, հայտնում է BBC-ն:
Ըստ ներքին գործերի նախարարության՝ ցուցարարներից մեկը մահացել է, երբ պայթուցիկ սարքը պայթել է ձեռքում՝ դառնալով առաջին զոհը բախումները սկսվելուց ի վեր:
Ցուցարարները մոլոտովի կոկտեյլներ են նետել իրավապահների ուղղությամբ: Կան ձերբակալվածներ և վիրավորներ:
Բողոքի ցույցեր են տեղի ունեցել այլ քաղաքներում նույնպես:
Հիշեցնենք, որ ըստ ԿԸՀ-ի՝ գործող նախագահ Ալեքսանդր Լուկաշենկոն վերընտրվել է 6-րդ անգամ՝ ստանալով ձայների 80.23%-ը: Նրա հիմնական մրցակից, ընդդիմադիր թեկնածու Սվետլանա Տիխանովսկայան ստացել է ձայների 9.9%: Վերջինս հրաժարվել է ընդունել ընտրությունների արդյունքները՝ ասելով, որ ինքն է իրական հաղթողը:
Նախագահական ընտրություններն անց են կացվել երկրի ղեկավարության հանդեպ աճող հիասթափությունների ֆոնին, առանց դիտորդների մասնակցության: Նախորդ օրերին ևս եղել են ճնշումներ ակտիվիստների և լրագրողների հանդեպ:
1994 թվականից երկիրը ղեկավարող Լուկաշենկոն ընդդիմության կողմնակիցներին բնութագրել է որպես դրսից կառավարվող «ոչխարներ» և խոստացել կանխել երկիրը պառակտելու փորձերը:
