17.09.2026 | 15:10
Փաշինյանը՝ ռուսական ռազմաբազայի դուրսբերման մասին // Գերմանիան ՀՀ ՊՆ-ին ձնագնացներ է նվիրել․ ԼՈՒՐԵՐ
Ազգային ժողովի դիմաց Ամուլսարի շահագործման դեմ միջոցառման 10 մասնակից է բերման ենթարկվել, մի քանիսն ազատ են արձակվել
Հասարակություն
10.08.2020 | 23:03
Այսօր Ազգային ժողովի դիմաց ի պաշտպանություն Ամուլսարի ակցիա իրականացնող քաղաքացիներին ոստիկանությունը բերման էր ենթարկել։
Քիչ առաջ Ոստիկանության մամուլի բաժնից Factor.am-ին հայտնեցին, որ ընդհանուր թվով բերման է ենթարկվել 10 քաղաքացի։ Ոստիկանությունից մեզ հայտնեցին նաև, որ քաղաքացիները բերման էին ենթարկվել Վարչական իրավախախտումների վերաբերյալ օրենսգրքի 182-րդ հոդվածով նախատեսված արարք կատարելու համար։ 182-րդ հոդվածով սահմանված է հասարակական կարգի պահպանության և հասարակական անվտանգության ապահովման պարտականությունները կատարելու ընթացքում զինծառայողի կամ ոստիկանության ծառայողի օրինական պահանջը չկատարելը, որն առաջացնում է տուգանքի նշանակում` սահմանված նվազագույն աշխատավարձի հիսնապատիկի չափով:
Իրավապաշտպան Զարուհի Հովհաննիսյանը, որը բերման ենթարկված քաղաքացիների թվում էր, մոտ մեկ ժամ առաջ ֆեյսբուքյան գրառմամբ հայտնել է, որ արդեն դուրս են եկել ոստիկանության բաժնից։ Ավելի վաղ՝ իրավապաշտպանն իր ֆեյսբուքյան էջում նշել էր, որ իրենց ոստիկանության Մալաթիայի բաժին են տեղափոխել։ Նա նաև հրապարակել էր լուսանկար, որտեղ երևում էր՝ ինչպես ոստիկանների գործողությունների արդյունքում դաստակի հատվածում վնասվածք էր ստացել։
Ոստիկանության մեկ այլ՝ Արաբկիրի բաժին բերման ենթարկված քաղաքացի Դավիթ Սիմոնյանն էլ Factor.am-ի հետ զրույցում նշեց, որ ոստիկանությունում 2 ժամ է անցկացրել։ «Բերման ենթարկեցին ոստիկանի օրինական պահանջը չկատարելու համար։ Ոստիկաններն իրենց նորմալ էին պահում, ամեն ինչ նորմալ էր, ոչ մի արտառոց բան չկար։ Բացատրություն գրեցի, ասացի, որ ես հավաք չեմ իրականացրել»,- մեզ հետ զրույցում նշեց Դավիթ Սիմոնյանը։
Նելլի Մելքոնյան
