ՀՀ վարչապետի խոսնակ Մանե Գևորգյանը ֆեյսբուքյան գրառմամբ անդրադարձել է այսօր տարածված տեղեկությանը, թե ադրբեջանական հաքերային հարձակման հետևանքով ՀՀ կառավարության սերվերների ղեկավարման համակարգից մեծածավալ տեղեկություն է կորզվել։
Վարչապետի խոսնակը գրել է․ «ՀՀ ԱԱԾ կողմից իրականացված աշխատանքների ընթացքում պարզվել է, որ համացանցում շրջանառվում է ՀՀ կառավարության սերվերների ղեկավարման համակարգի աշխատանքային գործընթացը պատկերող համակարգչային էկրանի լուսապատճենը (screenshot)։ Սա սակայն չի վկայում 55 տերաբայթ ծավալով տեղեկատվության կորզման մասին։ ԱԱԾ-ն շարունակում է աշխատանքները նշված լուսապատճենի ծագումը պարզելու եւ պետական սերվերներ ներթափանցելու մասին տեղեկությունը ստուգելու ուղղությամբ»։
Հիշեցնենք՝ այսօր տեղեկատվական անվտանգության փորձագետ Սամվել Մարտիրոսյանը ֆեյսբուքում հրապարակել էր լուսանկար և դրան կից նշել, թե ադրբեջանական հաքերները հայտնում են Հայաստանի կառավարական ներքին ցանց ներթափանցելու և 55 ՏԲ տեղեկություն տանելու մասին։ Ավելի ուշ Մարտիրոսյանը հայտնել էր, որ ադրբեջանցի հաքերների հնարավոր հարձակման հետևանքով կորզվել են նաև «Զվարթնոց» օդանավակայանի մի քանի տասնյակ աշխատակիցների տվյալները։
Նելլի Մելքոնյան
