07.07.2026 | 10:17
«Չայնիի ոլորաններ» կոչվող հատվածում տեղի է ունեցել քարաթափում
Սահմանված կարգով հանրությանը տեղյակ կպահենք․ ԱԳՆ խոսնակը՝ Մնացականյան-Բայրամով առաջիկա հնարավոր հանդիպման մասին
Քաղաքականություն
29.07.2020 | 13:46
Հայկական կողմն առայժմ տեղեկություն չունի ԵԱՀԿ Մինսկի խմբի շրջանակում 3+2 ձևաչափով հանդիպման վերաբերյալ։ Այս մասին Factor.am-ի զրույցում ասաց ԱԳՆ մամուլի խոսնակ Աննա Նաղդալյանը։
«Երբ նման որոշում լինի, ինչպես միշտ, մենք սահմանված կարգով հանրությանը տեղյակ կպահենք»,- նշեց Նաղդալյանը։
Նախօրեին, հիշեցնենք, ՌԴ ԱԳՆ-ում աղբյուրը «ՌԻԱ Նովոստի»-ին հայտնել էր, որ որ հայ-ադրբեջանական սահմանին տիրող իրադրության հետ կապված ԵԱՀԿ Մինսկի խմբի շրջանակում 3+2 ձևաչափով հանդիպումը (երեք համանախագահներ ՌԴ-ից, ԱՄՆ-ից և Ֆրանսիայից ու Հայաստանի և Ադրբեջանի արտգործնախարարները) կարող է տեղի ունենալ աշնան սկզբին։
Անդրադառնալով հարցին՝ ինչպե՞ս կանդրադառնա բանակցությունների ընթացքի վրա Ադրբեջանում նոր ԱԳ նախարարի նշանակումը՝ հաշվի առնելով, որ նա դիվանագիտական աշխատանքի փորձ չունի, Աննա Նաղդալյանը նշեց․ «Մենք ընդունել ենք ի գիտություն այն, որ Ադրբեջանի կրթության նախարարը ներկայում զբաղեցնում է ԱԳ նախարարի պաշտոնը: Սակայն մենք ելնում ենք այն իրողությունից, որ Ադրբեջանում արտաքին քաղաքական ուղղությունը մշակվում է բարձրագույն ղեկավարության կողմից, և այս առումով հայկական կողմը՝ Հայաստանը, բանակցություններ է վարում ոչ թե անձերի, անհատների, այլ Ադրբեջանի ներկայիս իշխանությունների ներկայացուցիչների հետ»։
Անժելա Պողոսյան
