15.03.2026 | 20:44
Կիևը պատժամիջոցներ է սահմանել Իրանի, Ռուսաստանի և ՌԴ պարալիմպիկների դեմ
«Մեր ակցիան քաղաքական բնույթ չի կրում»․ դիմորդներն ու նրանց ծնողները Աստվածաշունչ նվիրեցին ԿԳՄՍ նախարարին
Հասարակություն
28.07.2020 | 15:05
Բուհ չընդունված դիմորդներն ու նրանց ծնողները կրկին ԿԳՄՍ նախարարության առջև են՝ շարունակելու իրենց բողոքի ակցիան։ Ակցիան համակարգող Մասիս Բաբալյանը վստահ է, որ ԿԳՄՍ նախարարը չի ցանկանում հանդիպել իրենց հետ, քանի որ չի կարող իրենց ներկայությամբ հիմնավորել այն, ինչը որ հիմնավորում է իր ուղիղ եթերներում։ Այս մասին Մասիս Բաբալյանը նշեց լրագրողների հետ զրույցում։
Բաբալյանըհերքեց այն պնդումները, ըստ որոնց՝ ակցիան քաղաքական բնույթ է կրում։
«Մեր պահանջը մեկն է․ մեր երեխաների բուհ ընդունվելու, սովորելու իրավունքի վերականգնումը, ոչ մի քաղաքական մոտիվ գոյություն չունի։ Մեզնից ոչ ոք չի ասում դիմորդներին՝ ինչ անել։ Երեխաները իրենց քայլերով երբեք ոստիկանների աշխատանքներին չեն խանգարել»,- նշեց նա։
Անդրադառնալով նախարարի այն պնդմանը, որ դուրս մնացած դիմորդներից 63-ը լրացուցիչ փուլով արդեն իսկ ընդունվել են բուհեր, Բաբալյանը նշեց, որ ուսանողներն այդ քայլին գնացել են ճարահատյալ․ «Որոշել են գոնե այս պահի դրությամբ որևէ տեղ ընդունվել, հետագայում, երբ պայքարի սահմաններում կհասնենք արդյունքի, այսինքն՝ երբ կորոշվի, որ բոլոր դիմորդները, ովքեր բարձր գնահատականներ են ստացել, ապա իրենց պարտավոր են ընդունել բուհ»,- նշեց նա։
Ակցիայի մասնակիցներ ԿԳՄՍ նախարարի խորհրդականի միջոցով որպես նվեր Արայիկ Հարությունյանին փոխանցեցին Աստվածաշունչ ու խաչ։
«Նախարարը նվերն ընդունում է և որպես հավատացյալ մարդ՝ շատ շնորհակալ է նվերից»,- նշեց ԿԳՄՍ նախարարի խորհրդական Գոհար Մամիկոնյանը։
