16.03.2026 | 10:53
Սյունիքի նախկին մարզպետը դատի է տվել ՔՊ-ական Արմեն Խաչատրյանին` ֆեյսբուքյան գրառման համար․ նա 1 մլն դրամ է պահանջում
Շիրակում կորոնավիրուսից մահվան դեպքերն ավելացել են․ վարակի 26 նոր դեպք է հաստատվել
23.07.2020 | 15:11
Շիրակի մարզում կորոնավիրուսից մահվան դեպքերի աճ է նկատվում։ Ընդհանուր առմամբ, մարզում կորոնավիրուսից մահերի թիվը 35-ի է հասել։ Մահվան 4 նոր դեպքերը գրանցվել են Երևանում։ 48 հիվանդ էլ տեղափոխվել է Երևան և բուժվում է այնտեղ։ Այս մասին Factor.am-ին փոխանցեցին Շիրակի մարզպետարանից։
Ի դեպ՝ կորոնավիրուսային օջախներից մեկը Գյումրիի տարեցների տուն-ինտերնատն է, որի կորոնավիրուսով հիվանդ շահառուներից 5-ը մահացել է։
Շիրակի մարզպետարանի հրապարակած տվյալների համաձայն՝ հուլիսի 23-ի ժամը 11։30-ի դրությամբ Գյումրու ինֆեկցիոն հիվանդանոցում կորոնավիրուսով 55 հիվանդ է բուժվում, նրանցից 54-ը Շիրակի մարզի բնակիչ է։
Նշենք, որ մարզում կորոնավիրուսով հիվանդների թվի փոքր-ինչ նվազում է նկատվում։ Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 6919 նմուշառում, մայիսի 12-ից հուլիսի 22-ը ներառյալ Գյումրիում իրականացվել է 5565 նմուշառման հետազոտություն։
Հուլիսի 22-ին հաստատվել է կորոնավիրուսային հիվանդության 26 նոր դեպք։
Մարզում տնային ինքնամեկուսացման ցուցում ունի 982 քաղաքացի, նրանցից 306-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Մինչ այժմ կորոնավիրուսից առողջացել և հիվանդանոցից մինչ օրս դուրս է գրվել Շիրակի մարզի 422 բնակիչ։
Էմմա Չոբանյան
