15.07.2026 | 16:31
Ստամբուլում ռուս զբոսաշրջիկների են ձերբակալել մզկիթի վերածված Սուրբ Սոֆիայի տաճարում Աստվածաշունչ կարդալու համար
ԼՂ խնդրի կարգավորումը բխում է բանակցային գործընթացի մասնակից երկրների շահերից. ՌԴ ԱԳ փոխնախարար
Քաղաքականություն
22.07.2020 | 19:09
Լեռնային Ղարաբաղի հակամարտության կարգավորումը բխում է տարածաշրջանի բոլոր պետությունների և բանակցային գործընթացին մասնակցող երկրների շահերից: Այս մասին այսօր ՏԱՍՍ-ին տված հարցազրույցում ասել է Ռուսաստանի արտաքին գործերի փոխնախարար Ալեքսանդր Գրուշկոն:
«Ինչ վերաբերում է Լեռնային Ղարաբաղում տիրող իրավիճակին, մենք կարծում ենք, որ ոչ միայն Ռուսաստանը, այլև մյուս պետությունները, որոնք մտահոգված են այս տարածաշրջանում կայունության հաստատմամբ և ամրապնդմամբ, պետք է հանդես գան հայտարարություններով, որոնք կողմերին խրախուսում են խաղաղության հաստատման, հրադադարի հաստատման հարցում, որի մասին նրանք ոչ մի կերպ չեն կարողանում համաձայնության գալ»,- ասել է նա։
Ռուսաստանցի դիվանագետը հավելել է, որ իրավիճակի կայունացումը բխում է գործընթացի բոլոր մասնակիցների շահերից:
Նա նաև նշել է, որ Ռուսաստանի Դաշնությունը հակված է այն տեսակետին, որ ԵԱՀԿ Մինսկի խմբի շրջանակում մշակված պայմանավորվածությունները պետք է մնան բանակցային սեղանին:
«Ներկայիս ճգնաժամը չպետք է հանգեցնի այն տիտանական ջանքերով ձեռքբերված առաջընթացի նահանջին, որն առաջին հերթին ՌԴ-ի կողմից է ձեռք բերվել: Այս հակամարտության կարգավորումն էապես կբարելավի իրավիճակը տարածաշրջանում՝ ներառյալ բոլոր գործընկերների միջև երկկողմ հարաբերությունների բարելավումը: Մենք բոլորին կոչ ենք անում ընդունել այս դիրքորոշումը, հատկապես՝ Մինսկի խմբի երկրներին», – ասել է ՌԴ ԱԳ փոխնախարարը:
