17.12.2025 | 14:50
Նոտարական գործարքներ՝ թվային միջավայրում․ ինչ փոփոխություններ են սպասվում Կադաստրի կոմիտեում․ ՏԵՍԱՆՅՈՒԹ
Եռաբլուրում հուղարկավորվեց Տավուշում զոհված մայոր Գարուշ Համբարձումյանը. ՏԵՍԱՆՅՈՒԹ
Հասարակություն
16.07.2020 | 16:50
«Եռաբլուր» զինվորական պանթեոնում այսօր տեղի ունեցավ Տավուշում հակառակորդի կրակոցից զոհված մայոր Գարուշ Համբարձումյանի հուղարկավորության արարողությունը։
Մայորին հետմահու շնորհվեց Հայրենիքին մատուցած ծառայության համար 2-րդ աստիճանի մեդալ, որը հուղարկավորության ժամանակ հանձնեցին մայորի հորը։
Հուղարկավորության մասնակցող ՀՀ վարչապետ Նիկոլ Փաշինյանը խոնարհվեց զոհվածի հարազատների առջև։
Վարչապետից բացի, հուղարկավորությանը ներկա էին Ամենայն Հայոց Կաթողիկոս Գարեգին Բ-ն, ՀՀ պաշտպանության նախարար Դավիթ Տոնոյանը և բարձրաստիճան մի շարք պաշտոնյաներ։
Գարուշ Համբարձումյանն ավարտել է ՀՀ ՊՆ Վ. Սարգսյանի անվան ռազմական համալսարանը: Ստացել է սակրավորի մասնագիտություն ու նշանակվել ՀՀ ՊՆ N զորամասի ինժեներասակրավորային դասակի հրամանատար: Իսկ 2015թ.-ին նշանակվել ՀՀ ՊՆ N զորամասի ինժեներասակրավորային վաշտի հրամանատար:
Գարուշ Համբարձումյանը Գեղարքունիքի մարզի Լուսակունք համայնքից էր, խնամքի տակ ուներ անչափահաս երեխաներ։
Նշենք, որ 2016 թվականին ՊՆ-ն Գարուշ Համբարձումյանին ներկայացրել էր ԶՈւ լավագույն սպաները և հրամանատարները շարքում, այն ժամանակ նա դեռ կապիտանի կոչում ուներ։
Հուլիսի 12-ից սկսած՝ հակառակորդի հարձակման հետևանքով հայկական կողմը ունի չորս զոհ։ Վարչապետի որոշմամբ նրանք հետմահու պարգևատրվել են․ Հայաստանի պետական սահմանի Տավուշի հատվածի պաշտպանության ժամանակ զոհված՝ մայոր Գարուշ Համբարձումյանը՝ «Հայրենիքին մատուցած ծառայությունների համար» 2-րդ աստիճանի մեդալով, կապիտան Սոս Էլբակյանը՝ Արիության մեդալով, կրտսեր սերժանտներ Սմբատ Գաբրիելյանն ու Գրիշա Մաթևոսյանը՝ Մարտական ծառայության մեդալներով։
«Խոնարհվում եմ Ձեր և Ձեր ընտանիքների առաջ՝ նահատակված եղբայրներ: Մենք պիտի՛ կարողանանք արժանի լինել Ձեզ և Ձեր սխրանքին, և կլինե՛նք»,- իր ուղերձում նշել էր վարչապետը։
