Գյումրիում վերացվում են «ջրհեղեղի» ու կարկուտի հետևանքները, գնահատվում են վնասները. ԼՈՒՍԱՆԿԱՐՆԵՐ

Գյումրիում նախօրեին տեղացած հորդառատ անձրևի ու կարկուտի հետևանքների վերացման աշխատանքներն են տարվում։ Հիշեցնենք, որ Գյումրիում հուլիսի 13-ին աննախադեպ քանակությամբ տեղումներ են գրանցվել։ Քաղաքի փողոցները ջրածածկ էին եղել, անձևաջրերը լցվել էին բնակելի տներ, բազմաբնակարան շենքերի նկուղներ, սպասարկման օբյեկտներ։ Քաղաքում երթևեկությունը դարձել էր դժվարանցանելի, հոսանքազրկվել էին թաղամասեր։ Հատկապես մեծ վնասներ են կրել տնակների բնակիչները․ անձևրաջրերն ու կարկուտից գոյացած սառույցի  կտորները լցվել են տնակներ։

Factor.am-ի հետ զրույցում Գյումրու քաղաքապետարանի ենթակայության «Գյումրու կոմունալ ծառայություն» հիմնարկի տնօրեն Վարդգես Սամսոնյանը նշեց, որ հիմա արագ կազմակերպում, հեռացնում են անձրևի ու կարկուտի առաջացրած հետևանքները, համայնքի կողմից տարվում են վնասների գնահատման աշխատանքներ։

«Բավականին մեծ են հետևանքները, երեկվանից, անձրևը դեռ չդադարած, աշխատանքներ ենք տանում, ամբողջ աշխատակազմով արտակարգ ռեժիմով աշխատում ենք։ Քաղաքապետի կողմից ստեղծվել է հանձնաժողով, նիստը քիչ առաջ ավարտվեց։ Հիմա հանձնաժողովը զբաղվելու է նաև վնաս կրած ընտանիքների, տնակների հասցեներով։ Մնում է հանձնաժողովը կարողանա շատ արագ ուսումնասիրի, նայենք ինչքան մարդու, ինչ չափի վնաս է պատճառվել»,- ասաց Վարդգես Սամսոնյանը։

Նրա խոսքով՝ նույնիսկ քաղաքի տարեց բնակիչների հետ են խոսել, Գյումրիում նման դեպք ոչ ոք չի հիշում, եղանակային նման անոմալ վիճակ ոչ ոք չի տեսել։

Ըստ Սամսոնյանի՝ քաղաքի ջրահեռացման համակարգերը նորմալ գործել են, սակայն տեղումների քանակը անհամատեղելի է եղել ջրահեռացման համակարգերի տարողունակության հետ։

«Մեր աշխատողներն առավոտից գնացել են ջուրը հեռացնելու, այնտեղ շատ քիչ է լցված եղել հողային հատվածը։ Օրինակ՝ խողովակի տրամաչափը, եթե ընդունենք՝ րոպեում 10 լիտր պետք է տաներ, տեղումները եղել են 30-40 կամ շատ անգամնենր ավելի։ Միայն ջրահեռացման համակարգի վրա կենտրոնանալը սխալ է, այն իդեալական աշխատում է, աշխատողներն ասում են՝ լցված չի»,- ասաց Վարդգես Սամսոնյանը՝ հավելելով, որ ջրահեռացման համակարգերը պարբերաբար մաքրվում են։

Նշենք, որ «Հիդրոօդերևութաբանության և մոնիթորինգի կենտրոն»-ի տարածած հաղորդագրության համաձայն՝ Գյումրիում 1 ժամվա ընթացքում աննախադեպ քանակությանբ տեղումներ են գրանցվել։

«Հուլիսի 13-ի ցերեկը, ժամը 16։00-17։00 ընկած ժամանակահատվածում, Գյումրիում դիտվեց աննախադեպ երևույթ, երբ 1 ժամվա ընթացքում տեղաց խիստ հորդառատ անձրև և երկարատև կարկուտ։ Տեղումների քանակը 1 ժամվա ընթացքում կազմեց 81 մմ, որը ամսական նորմայի կրկնակին է»,- ասվում է հրապարակման մեջ։

Էմմա Չոբանյան