Քաղաքականություն
10.07.2020 | 22:552019 թվականի հոկտեմբերի 20-ին Եղեգնաձոր քաղաքում ՀՀ ԶՈՒ փոխգնդապետ Արա Մխիթարյանի դաժան ծեծի միջադեպի արդյունքում պաշտոնանկ եղած Վայոց ձորի նախկին մարզպետ Տրդատ Սարգսյանը նոր պաշտոն ունի․ նա երեկ նշանակվել է «Քաղաքացիական պայմանագիր» կուսակցության աշխատակազմի ղեկավար։
Այս նշանակումը սոցիալական ցանցերում դժգոհության տեղիք է տվել: Ծեծված փոխգնդապետը, հիշեցնենք, անցած տարվա սեպտեմբերից՝ արդեն տասն ամիս, կոմայի մեջ է։ Նրա հայրը՝ Սամվել Մխիթարյանը, չի ցանկանում մեկնաբանել իշխող «Քաղաքացիական պայմանագիր» կուսակցության այս որոշումը:
Հիշեցնենք՝ 31-ամյա Տրդատ Սարգսյանը 2019 թվականի հոկտեմբերին հրաժարականի դիմում ներկայացրեց, սեպտեմբերի 20-ին Եղեգնաձոր քաղաքում Զինված ուժերի փոխգնդապետ Արա Մխիթարյանի դաժան ծեծի ենթարկվելուց հետո։
Հարազատները պնդում են, որ փոխգնդապետին ծեծել է Տրդատ Սարգսյանի օգնականը, ծեծին ներկա է եղել նաև մարզպետը։ Դեպքի առթիվ հարուցվեց քրեական գործ, մարզպետի օգնական Հարություն Գրիգորյանը և նրա եղբայրը՝ Զավեն Գրիգորյանը, կալանավորվեցին: Վերջինս հետագայում գրավի դիմաց ազատ արձակվեց, իսկ Տրդատ Սարգսյանը, թեև չի ընդունում փոխգնդապետի հարազատների կողմից իրեն վերագրվող մեղադրանքները, սակայն աղմկոտ միջադեպի ֆոնին հրաժարական ներկայացրեց:
Ի դեպ, Տրդատ Սարգսյանի անունը Վայոց ձորի մարզպետ նշանակվելուց հետո այլ աղմկահարույց հիշատակումներ էլ է ունեցել։ Վայոց ձորի նախկին փոխմարզպետ Ռազմիկ Տոնոյանը, հիշեցնենք, նրան մեղադրել էր անգործության, չարաշահումների վրա աչք փակելու, վարչական ռեսուրս կիրառելու և կոռուպցիոն գործելաոճով հայտնի համայնքապետերի հետ համագործակցելու համար:
Տրդատ Սարգսյանի այս նշանակումն իրավապաշտպան Ավետիք Իշխանյանին Սյունիքի նախկին մարզպետ Սուրիկ խաչատրյանի վերանշանակման հետ կապված զուգահեռների տեղիք է տվել։ Սյունիքի նախկին մարզպետ Սուրիկ Խաչատրյանը, հիշեցնենք, 2013 թվականի ամռանը Գորիսում՝ իր առանձնատան մոտ Ավետիք Բուդաղյանի սպանությունից հետո 2014-ին կրկին վերանշանակվեց մարզպետի պաշտոնում: Իսկ ահա մեկ տարի անց էլ՝ 2015 թվականին, Սյունիքի Սղդի գյոլ կոչվող տարածքում Սուրիկ Խաչատրյանի որդին՝ Տիգրան Խաչատրյանը, հարվածեց և վնասեց Հարութ Զաքարյանի աչքը, ինչի պատճառով նա տեսողական լուրջ խնդիր ձեռք բերեց:
Իրավապաշտպան Զառա Հովհաննիսյանը, սակայն, նման զուգահեռ չէր տանի։ Ըստ նրա՝ կան էական տարբերություններ կուսակցական և պետական պաշտոններում նշանակվելու միջև:
Մինչդեռ Ավետիք Իշխանյանը շեշտում է՝ իշխող ուժի աշխատակազմի ղեկավարի պաշտոնն առանցքային նշանակություն ունի։ «Տրդատ Սարգսյանի նշանակումը ցույց է տալիս նախկին և ներկա իշխանությունների նույն մտածողությունը, գումարած դրան հասարակության անտարբերությունն ու ոչ քաղաքակիրթ լինելը»,- պնդում է Ավետիք Իշխանյանը:
Իրավապաշտպան Զառա Հովհաննիսյանը ևս նոր Հայաստանում մտահոգիչ միտումներ է արձանագրում․ ըստ նրա՝ այս իշխանության օրոք ականատես ենք լինում մերժված երևույթների: Իրավապաշտպանը կարծում է, որ նման աղմկոտ գործերով վճիռները պետք է կայացվեն հնարավորինս շուտ՝ հասարակական դժգոհությունները հանդարտեցնելու համար:
Իսկ ահա իշխանական թիմում Տրդատ Սարգսյանին ՔՊ աշխատակազմի ղեկավարի պաշտոնում նշանակելու հարցում արտառոց ոչինչ չեն տեսնում:
«Իմ քայլի» պատգամավոր, ՔՊԿ վարչության անդամ Արփի Դավոյանը նշում է, թե քննությամբ պարզվել է, որ Տրդատ Սարգսյանը դեպքին մասնակցություն չի ունեցել: Ըստ պատգամավորի՝ Սարգսյանը մարզպետի պաշտոնից հեռացավ հանրության կարծիքը հաշվի առնելով, իսկ նրան Սուրիկ Խաչատրյանի հետ համեմատելու եզրեր չկան:
Մեկ օր է, ինչ Տրդատ Սարգսյանը իշխող ուժի աշխատակազմի ղեկավարն է: Հանրության շրջանում կան որոշակի դժգոհություններ և հարց է առաջանում՝ արդյոք նա, ըստ անհրաժեշտության, այս անգամ էլ կլսի՞ քաղաքացիներին և իրավիճակը լարված չպահելու համար հրաժարական կտա՞:
Մանրամասները՝ տեսանյութում:
Նարեկ Կիրակոսյան
