29.04.2026 | 12:59
Ձևավորվում է նոր Հարավային Կովկաս. Թուրքիայում ԱՄՆ դեսպանը ողջունել է Գյումրի-Կարս երկաթգծի հարցով ՀՀ-Թուրքիա հանդիպումը
Գյումրիի Նանսենի անվան գիշերօթիկ հաստատության 10 երեխա ու 5 աշխատակից վարակվել են կորոնավիրուսով
10.07.2020 | 16:18
Գյումրիում գործող վերջին` «Ֆրիտյոֆ Նանսենի անվան երեխաների խնամքի ու պաշտպանության թիվ 2 գիշերօթիկ հաստատությունում» գրանցվել են կորոնավիրուսով վարակման դեպքեր։ Հաստատությունում խնամվող 21 երեխաներից 10-ը վարակվել են կորոնավիրուսով։ Կորոնավիրուս է հաստատվել նաև 5 աշխատակցի մոտ։ Այս մասին մեզ հետ զրույցում հայտնեց Աշխատանքի և սոցիալական հարցերի նախարարի մամուլի խոսնակ Սոնա Մարտիրոսյանը։ Նա նշեց, որ երեխաներն ու աշխատակիցները հոսպիտալացված չեն, գիշերօթիկում են, իրենց լավ են զգում։
«Բոլորը իրենց լավ են զգում, որևէ մեկը չի հոսպիտալացվել, հակահամաճարակաբանների հետ աշխատանք տարվել է, իրենք բժշկական զննում անցել են։ Ըստ էության ասիմպտոմ են տանում հիվանդությունը։ Երեխաները գիշերօթիկում են, որևէ մեկը հոսպիտալացված չի։ Աշխատակիցներից մեկի մասով մտահոգություն ունենք ոչ թե, որ հիվանդությունն է ծանր տանում, այլ ռիսկային գոտում է, շաքարային դիաբետ ունի, այդ մասով ենք անհանգիստ։ Մյուսներն իրենց լավ են զգում»,- ասաց Սոնա Մարտիրոսյանը։
Նշենք, որ այս գիշերօթիկը հունիսի 25-ին լուծարվել էր։ Նանսենի անվան գիշերօթիկ հաստատության փոխարեն այժմ գործելու է «Երեխայի խնամքի ու աջակցության ճգնաժամային կենտրոնը»։ Այստեղ էլ իրականացվելու է երեխաների հետագա խնամքը։
Էմմա Չոբանյան
