Արման Բաբաջանյանն ամենաքիչ ձայն ստացած պատգամավորն է, մեր համակիր լինելը շղարշ էր՝ ԱԺ մտնելու համար. Անի Սամսոնյան. ՏԵՍԱՆՅՈՒԹ

ԱԺ «Լուսավոր Հայաստան» խմբակցության պատգամավոր Անի Սամսոնյանն այսօր լրագրողների հետ զրույցում նշեց, որ, չնայած ԿԸՀ-ն իր որոշումը կայացրեց, այնուամենայնիվ, իրենք կշարունակեն իրենց աշխատանքները և կդիմեն բողոքարկման ընթացակարգերի՝ իրենց պատկանող 18-րդ մանդատը վերականգնելու համար:

«Այդ հարցում հետևողական ենք, բայց այս պահին մեր աշխատանքների և մարտավարության մասին ոչինչ չեմ կարող ասել»,-շեշտեց նա։

Հարցին` չե՞ն պատրաստվում օրենսդրական նախաձեռնության միջոցով խնդրին հիմնավոր կարգավորում տալ, պատգամավորը պատասխանեց. «Այդ հարցին հիմնավոր կարգավորում կտրվի թե՛ Սահմանադրության մակարդակով, և թե՛ օրենսդրական մակարդակով: Արման Բաբաջանյանն ամենաքիչ ձայներ ստացած պատգամավորն է 2018 թվականին ձևավորված պառլամենտում` 300-ից մի քիչ ավելի ձայն է հավաքել: Նա իրեն համարել է ԼՀԿ-ի համակիր, բայց մենք հասկացանք, որ համակիր լինելը շղարշ էր՝ մեր միջոցով պառլամենտ մտնելու համար: Ես այն պատգամավորներից եմ, ով հրապարակային ներողություն է խնդրել, որ Արման Բաբաջանյանն այսօր պառլամենտում է՝ որպես ԱԺ պատգամավոր: Դավաճանությանը հակված մարդիկ միշտ փնտրում են մեղավորներ, դա հոգեբանական անհրաժեշտ բաղադրիչ է՝ բոլոր դավաճանների համար»:

Factor.am-ի դիտարկմանը, թե Արման Բաբաջանյանը նշում է, որ իր մանդատը ԼՀԿ-ինը չէ, այլ ժողովրդինն է, հետևաբար՝ չի պատրաստվում այն վերադարձնել, Սամսոնյանը նշեց. «Որքան գիտեմ՝ նա ռեյտինգային կարգով չի ընտրվել և համամասնական կարգով բոլոր մանդատները պատկանում են ԼՀԿ-ին»:

Մանրամասները՝ տեսանյութում:

Մերի Մարտիրոսյան