18.11.2024 | 09:47
Երևանի քաղաքապետարանի գործակարգավարական նիստը՝ ՈՒՂԻՂ
Գյումրիի ծերանոցի կորոնավիրուսով հիվանդ շահառուների թիվը 1-ով ավելացել է․ 37 հոգի հոսպիտալացված է, գրանցվել է մահվան 2 նոր դեպք
08.07.2020 | 15:36
Արդեն տեղեկացրել ենք, որ Գյումրիի տարեցների-տուն ինտերնատում կորոնավիրուսի դեպքեր են հայտաբերվել։ Խնամքի կենտրոնի 151 շահառուից 56-ի մոտ կորոնավիրուս է հայտնաբերվել, կա վարակման նոր դեպք։ Վարակվածների մեծ մասը տարեցներն են, խնամքի կենտրոնի շահառուները հիմնականում 65-ից բարձր տարիք ունեցող անձինք են։
Նշենք, որ մայիսի 1-ից Հայկական Կարմիր Խաչն է ստանձնել խնամքի կենտրոնի կառավարումը և այն այժմ կոչվում Գյումրու շուրջօրյա խնամքի կենտրոն։
Մեզ հետ զրույցում Հայկական Կարմիր Խաչի լրատվական ու լուսաբանման բաժնի վարիչ Նունե Գրիգորյանը տեղեկացրեց, որ կորոնավիրուսի վարակման առաջին դեպքերը գրանցվել են անցյալ շաբաթվա վերջին․ շաբաթ, կիրակի օրերին ամեն ինչ շատ արագ զարգացել է։
«Այսօր մեկ հոգի ավելացել է, մեկ խնամող ունեինք, որը Գյումրիի հիվանդանոցում էր այլ հիվանդություններով, այնտեղ թեստավորել են, իր մոտ էլ է հաստատվել։ Շահառուներից ընդհանուր 56 հոգի են վարակվածները»,- ասաց Նունե Գրիգորյանը։ Նա նշեց, որ ի սկզբանե 5 պացիենտի վիճակը ծանր է եղել, հոսպիտալացվել է 37 հոգի։
«Առաջին օրը ունեցել ենք 5 հոգի ծանր, որոնցից մեկը մահացել է՝ նա քաղցկեղ է ունեցել, ևս երկու հոգի երեկ են մահացել, այդ 5-ն են ծանր եղել։ Մնացած հիվանդները միջին ծանրության են։ 37 հոգի հիվանդանոց է տեղափոխվել, որոնցից 4-ը Երևան, 3-ը Գյումրիի ինֆեկցիոն, մնացածը՝ Սպիտակի կորոնավիրուսի հիվանդանոց»,- փոխանցեց Նունե Գրիգորյանը։
Խնամքի կենտրոնի 66 աշխատակիցներից էլ 12 են վարակվել կորոնավիրուսով, նրանք մեկուսացած են տներում։
Կառույցում խիստ կարանտին է, ինչպե՞ս է ստացվել, որ վարակը ներս է թափանցել․ մեր զրուցակիցը նշում է՝ իրենց համար էլ պարզ չէ վարակի տարածման աղբյուրը։ Նրա պնդմամբ՝ բացառված է, որ շահառուները կարողանան ներս ու դուրս անել։
«Մեր անձնակազմը խիստ կարանտինի մեջ է աշխատել, թեստավորվել են աշխատանքի անցնելիս, ամեն երկու շաբաթը մեկ իրենց հերթափոխը փոխել են։ Եվ դրանից առաջ թեստավորվել են, հավանաբար գաղտնի շրջան է եղել, որը չի արտահայտվել։ Նույնիսկ մենք անցանք նրան, որ աշխատողները երկու շաբաթով մնան այնտեղ, դուրս չգան։ Շաբաթը երկու անգամ ախտահանվել է տարածքը, սակայն, ցավոք, չկարողացանք խուսափել ներթափանցումից»,- ասաց Գրիգորյանը։
Այժմ խնամքի կենտրոնը համագործակցում է Հիվանդությունների վերահսկման ու կանխարգելման ազգային կենտրոնի Շիրակի մասնաճյուղի հետ, իրականացվում են համապատասխան միջոցառումներ։
«Համաճարակաբանները գալիս են, խորհրդատվություն ցուցաբերում, որովհետև մեկուսացվածներ ունենք 18 հոգի, 37-ն են հիվանդանոցում, 18 հոգի ասիմպտոմ ունենք։ Նրանց համար մեկուսարան է առանձնացվել՝ մի հարկաբաժին, համաճարակաբանների խորհրդատվությամբ համապատասխան միջոցառումներ են իրականացվում»,- տեղեկացրեց Նունե Գրիգորյանը։
Էմմա Չոբանյան
Գլխավոր լուսանկարը՝ արխիվից
