Արտառոց բան չկա, նորմալ ընթացակարգ է. Նիկոլայ Բաղդասարյանը ՄԻԵԴ-ի՝ ՍԴ նախկին դատավորների հարցով կառավարությանն ուղղած հարցադրումների մասին

ՄԻԵԴ-ը ոչինչ չի ընդունել։ Կա ընթացակարգ, երբ դու կարող ես արագ դիմել Եվրոպական դատարան՝ պատճառաբանելով, որ ներպետական ատյանների պաշտպանությունն արդյունավետ չէ։ Այդ դեպքում ՄԻԵԴ-ը հարցադրմամբ դիմում է ՀՀ-ին, որից հետո քննարկում է, թե արդյոք արագացված ընթացակարգով պիտի հարցը քննի՞, թե ընդհանուր ընթացակարգով։ Այս մասին Factor.am-ին ասաց «Իմ քայլը» խմբակցության պատգամավոր Նիկոլայ Բաղդասարյանը՝ խոսելով ՍԴ նախկին նախագահի և նախկին դատավորների կողմից իրենց լիազորությունների դադարեցումը վիճարկելու հարցով ՄԻԵԴ-ին ուղղված դիմումների մասին, որից հետո Եվրոպական դատարանը ՀՀ կառավարությանը հարցադրումներ էր ուղղել։

«Այստեղ արտառոց որևէ բան չկա։ Ցավոք, մամուլը, ԶԼՄ-ները, որոնք սպասարկում են Ռոբերտ Քոչարյանի և Սերժ Սարգսյանի կլաններին, փորձում են հասարակությանն այդ սուտը մատուցել, թե իբր Եվրոպական դատարանն իրենց դիմումները վարույթ է ընդունել, իբր դա արտառոց բան է։ Մինչդեռ դա սովորական երևույթ է»,- շեշտեց պատգամավորը։

Ի՞նչ շանսեր ունեն ՄԻԵԴ-ում հաջողության հասնելու հարցում ՍԴ նախկին նախագահը և նախկին դատավորները, այս առնչությամբ Բաղդասարյանն ասաց, որ դա պետք է գնահատեն այդ անձանց փաստաբանները։

«Խնդիրն այն է, որ ավելի շատ փորձում են ոչ թե իրավական ճանապարհով գնալ, այլ աղմուկ բարձրացնել, վարկաբեկել իշխանությանը, ավելի շատ ոչ թե իրավական, այլ քաղաքական գործընթաց է»,- նշեց նա։

Ըստ պատգամավորի՝ ՍԴ-ում ճգնաժամը դեռևս չի հանգուցալուծվել։ «Դա կլինի, երբ 3 սահմանադրական մարմինները կառաջարկեն ՍԴ դատավորների իրենց թեկնածուներին ԱԺ-ին։ Թեկնածուներին եթե դրական գնահատական տրվի, դրանից հետո իրենք կստանձնեն ՍԴ դատավորի պաշտոնը և իրենց միջից կընտրեն ՍԴ նախագահ»,- ասաց Բաղդասարյանը։

Նա շեշտեց, որ դրանից հետո բոլոր պետական մարմինները պարտավոր են հարգել դատարանի այսուհետ կայացրած որոշումները և ընդունեն ՍԴ լեգիտիմությունն ու առանց վիճարկելու կատարեն նրանց որոշումների մեջ ներկայացված եզրահանգումները։

Մերի Մարտիրոսյան