Էլմար Մամեդյարովի գլխին մութ ամպեր են կուտակվում․ Ադրբեջանի ԱԳՆ բարձրաստիճան պաշտոնյաներին մեղադրանքներ են առաջադրվել

Ադրբեջանի Պետական անվտանգության ծառայությունը տեղեկատվություն է տարածել  հուլիսի 3-ին արտգործնախարարությունում տեղի ունեցած հատուկ գործողության առթիվ։ Այս մասին հաղորդում են տեղի լրատվամիջոցները։

Անվտանգության ծառայությունից հայտնում են, որ տեղեկություններ են ստացվել , որ ԱԳՆ-ի մի շարք պաշտոնյաներ դիտավորությամբ չարաշահել են իրենց պաշտոնական դիրքն ու կատարել  ապօրինի արարքներ, որով նշանակալի վնաս է պատճառվել պետությանը։ Կատարվել են համապատասխան օպերատիվ գործողություններ։

«Ուսումնասիրվել է պետական միջոցների յուրացման մասին տեղեկատվությունը՝ նախատեսված  ԱԳՆ առանձին կառույցների գործունեության ապահովման համար, կաշառք ստանալու, այդ թվում՝ օտարերկրյա քաղաքացիների վիզաների դիմումների, ինչպես նաև անօրինական այլ գործողությունների կատարման  մասին տեղեկատվությունը։  Անօրինական գործողությունների կատարման համար կասկածվում են ԱԳՆ աշխատակազմի ղեկավար, մրցութային հանձնաժողովի նախագահ Ֆարհադ Մոլազադեն, տնտեսական բաժնի պետ Սալիմ Ալիզադեն, հյուպատոսաիրավաբանական բաժնի պետ Նուրփաշա Աբդուլաևը»,- ասվում է հաղորդագրության մեջ։

Ֆարհադ Մոլազադեն ու Սալիմ  Ալիզադեն որպես մեղադրյալ են ներգրավված  պաշտոնական դիրքի չարաշահման, յուրացման ու կաշառքի, Նուրփաշա Աբդուլաևը՝ կաշառք ստանալու փաստով։ Դատարանի որոշմամբ՝ նրանց նկատմամբ կիրառվել է կալանքը՝ որպես խափանման միջոց։

Նշենք, որ վերջին շրջանում  Ադրբեջանի արտգործնախարար Էլմար Մամեդյարովի գլխին մութ ամպեր են կուտակվում։ Նրա դեմ սկսվել է տեղեկատվական  արշավ, քաղաքական, հասարակական շրջանակներում առկա է որոշակի դժգոհություն Մամեդյարովի գործողություններից։

Ավելի վաղ Մամեդյարովը հայտնվել էր սկանդալի կենտրոնում, երբ ադրբեջանական լրատվամիջոցները տեղեկություններ էին հրապարակել, որ արտգործնախարարի որդին Նյու Յորքում 4 մլն դոլար արժողությամբ երկու բնակարան է գնել։ Այս լուրը բուռն քննարկումների տեղիք տվեց Ադրբեջանում։

Արտգործնախարությունից այդպես էլ չէին արձագանքնել այս տեղեկությանը՝ նշելով, որ նախարարի անձնական կյանքին առնչվող լուրերը չեն մեկնաբանում։  Միաժամանակ հայտնել էին, որ կոռուպցիոն սկանդալների մեջ ԱԳՆ-ի անվան օգտագործումն անթույլատրելի է։

Այնուհետև ԱԳՆ խոսնակ Լեյլա Աբդուլաևան հայտարարել էր, որ ԱԳՆ-ի  դեմ ծավալվող  արշավի հետաքննության  ու համապատասխան միջոցների կիրառման համար  դիմել են Ադրբեջանի Պետական անվտանգության ծառայությանը։

«Արտաքին գործերի նախարարության կողմից իրականացվող առաջադրանքները ռազմավարական նշանակություն ունեն,  կարևոր պետական ​​գերատեսչության մասին կեղծ և կողմնակալ տեղեկատվության կանխամտածված տարածումը  ոչ միայն սպառնում է ազգային շահերին, այլև խաթարում  մեր անկախ հանրապետության միջազգային հեղինակությունը:  Այս պատճառներից  ելնելով՝ մենք անհրաժեշտ ենք համարում հետաքննել այս սևացնող արշավը և միջոցներ ձեռնարկել՝ Ադրբեջանի օրենսդրությանը համապատասխան», – ասել էր  Լեյլա Աբդուլաևան:

Ստացվում է, որ Պետական անվտանգության ծառայությունը ձերբակալություններով պատասխանեց ԱԳՆ դիմումին։ Որոշ շրջանակներ էլ նշում են, որ ԱԳՆ-ի շուրջ կատարվող իրադարձությունները կարող են հանգեցնել Մամեդյարովի պաշտոնանկությանը։

Էմմա Չոբանյան