«Գյումրի» բժշկական կենտրոնին թույլ է տրվել իրականացնել տրիաժ ծառայություն

Շիրակի մարզում կորոնավիրուսով հիվանդների սպասարկման  համար  հրատապ է ռեանիմացիոն ու տրիաժային ծառայությունը։  Մարզպետ Տիգրան Պետրոսյանն  ավելի վաղ մեզ հետ զրույցում ասել էր, որ առաջարկներով դիմել են Առողջապահության նախարարությանը։

Տեղեկացանք, որ նախարարությունը «Գյումրի» ԲԿ-ին թույլ է տվել իրականացնել տրիաժ ծառայություն։ Հիվանդանոցը դեռ ամիսներ առաջ  էր իրականացնում տրիաժ, սակայն պետական ֆինանսավորում չէր ստանում։ Ծառայության համար այժմ առանձնացված է հատուկ բաժանմունք։

«Մենք ուզում էինք տրիաժով մոդուլներ հավաքեինք «Գյումրի» բժշկական կենտրոնի հարակից տարածքում։ Այն  նպատակահարմար չէին գտել, քանի որ կողքը շինարարություն է գնալու։ Իսկ ինչ մնում  է «Գյումրի» ԲԿ-ի ունեցած ներքին հնարավորություններին,  ոչ արդեն ավելացնելու,  ունեցած բաժանմունքը, որը մեկուսարաններ էր իրենից ներկայացնում՝ 15 հատ, թույլ են տվել, կոդը բացել են, և մենք տրիաժի պետական ֆինանսավորումը ստանում ենք»,- մեզ հետ զրույցում ասաց «Գյումրի» ԲԿ-ի տնօրեն Արմեն Իսահակյանը։

Տնօրենը նշեց, որ մեկուսարաններում սովորաբար 8-10 հիվանդ է լինում, իսկ եթե առաջնային օղակները ավելի լավ աշխատեն,  հիվանդների այդ քանակը չի լինի։

«Մեր խնդիրն այն է, որ առաջնային օղակները չեն հասցնում նմուշառաում անել։ Այդ հիվանդները վատանում են, գալիս են բժշկական կենտրոն։ Այդ դա է խնդիրը, որ մենք միշտ վատ վիճակում ենք հայտնվում։ Սահմանափակ է  նաև  կենտրոնի հնարավորությունը՝ տրիաժ անելու»,- ներկայացրեց Արմեն Իսահակյանը։

Նրա խոսքով՝ այս սեզոնի համար շատացել է նաև թոքաբորբով հիվանդների թիվը։

«Օրինակ, երեկ 5 հիվանդ ունեինք տրիաժ կենտրոնում,  նմուշառել էինք,  պատասխանը երեկոյան եկավ։ Ընդամենը  մեկն էր, որ դրական էր, 4-ը՝ բացասականով տեղափոխվել են բաժանմունք, որպես թոքաբորբով բուժվող»,- ասաց  տնօրենը։

Զրույցի ընթացքում տեղեկացանք նաև, որ «Գյումրի» ԲԿ-ի կորոնավիրուսով հիվանդ բուժաշխատողների մեծ մասն արդեն ապաքինվել է։

«Մեր բժիշկներն ապաքինվել են, ունենք 2  նոր հիվանդ ու երեք հոգի՝ չվերադարձած, որոնք  արդեն  լավացել են,  մնացածը վերադարձել են աշխատանքի։  Պլանավորում ենք հիվանդանոցի պլանային վիրահատությունների վերսկսումը, արդեն հնարավորություն ունենք  նաև այդ ուղղությամբ աշխատելու»,- ասաց Արմեն Իսահակյանը։

Էմմա Չոբանյան