18.11.2024 | 09:50
Սասուն Խաչատրյանը հրաժարականի դիմում է ներկայացրել. Կոմիտեն պաշտոնապես հաստատեց
Պապի տնկած 40 տարվա ծառերը կտրելու համար բնակիչն ու գյուղապետը հայտնվել են ոստիկանությունում
Հասարակություն
03.07.2020 | 20:02
Շիրակի մարզի Մարմաշեն համայնքի Հացիկ բնակավայրի վարչական ղեկավարի և բնակիչ Լենա Մանուկյանի միջև ծառերը հատելու պատճառով տարաձայնություններ են առաջացել: Ոստիկանությունում նյութեր են նախապատրաստվում: Լենա Մանուկյանը դիմել է Factor.am-ին և հայտնել, որ մի քանի օր առաջ Հացիկի վարչական ղեկավար Կարեն Պետրոսյանն անօրինական հատել է իր հողամասի և հարակից տարածքի ծառերը:
Ըստ բնակչի, համայնքապետարանից նախապես չեն զգուշացրել և որևէ հիմնավորում չեն ներկայացրել. «Պապիս տնկած երեսուն տարվա ծառերը կտրեցին, մեզ որևէ թույլտվություն ցույց չտվեցին: Իբր հոսանքալարերն անցկացնելու համար կտրեցին ցանկապատի մոտ գտնվող հացենիները և մեր հողամասի մեջ գտնվող թթենին: Առանց մեր իմացության կտրել են, անգամ ցանկապատն են վնասել, կտրված ճյուղերն էլ ընկել են մյուս ծառերի վրա: Մենք տեղյակ չենք եղել, տանը նստած ենք եղել, իրենք կտրել են: Գյուղապետն է արել, ասում է՝ համայնքապատկան է, որն ուզեմ կկտրեմ»:
Լենա Մանուկյանն ասաց, որ դիմել է ոստիկանություն, եթե հանգամանքները չպարզվեն, ապա դիմելու է նաև Դատախազություն: Նա պահանջում է, որ իրեն ներկայացնեն Մարմաշեն խոշորացված համայնքի ավագանու այն որոշումը, որի համաձայն հատվել են Հացիկի ծառերը. «Ես չգիտեմ՝ ինքը թույլտվություն ունի, թե՝ ոչ, բայց որ միջամտեցինք, էլ չշարունակեց ծառահատումը: Ծառերից մեկի հատումը կիսատ մնաց, եթե թույլտվություն ունենար՝ ավարտին կհասցներ, բայց չարեց մեր միջամտելուց հետո: Երկու հատը կտրել՝ տարել են, իսկ մյուսը միջամտեցինք, կիսատ մնաց՝ բերքը վրան»:
Հացիկի վարչական ղեկավար Կարեն Պետրոսյանը Factor.am-ի հետ զրույցում նշեց, որ ծառերը ոչ թե հատվել են, այլ՝ էտվել: Նա հավաստիացնում է, որ դրանք համայնքապատկան ծառեր են, իսկ էտելու անհրաժեշտությունը պայմանավորված է եղել համայնքի արտաքին լուսավորության խնդրի կարգավորմամբ: «Ես ծառ չեմ կտրել, համայնքապատկան երեք ծառի ճյուղեր եմ էտել, որը էլեկտրալարերին էր խանգարում: Գյուղի արտաքին լուսավորությունն Էլցանցից եկել կտրել էին, քանի որ ծառի ճյուղերը խանգարում էին: Ծառերից չորս մետր եմ կտրել, որ լույսերը միացնեն, քանի որ մեկ ամիս է՝ զրկված էինք գիշերային լուսավորությունից: Բնակչին չեմ զգուշացրել, քանի որ դա համայնքի տարածքն էր ու համայնքի ծառերը: Իր հողամասում չի եղել, երեքն էլ ճանապարհի վրա է, համայնքապետարանից էլ թույլտվություն եմ ունեցել: Իրենք ասում են, որ քառասուն տարի առաջ իրենց պապն է տնկել»,- ներկայացրեց գյուղապետը:
Ոստիկանության հասարակայնության հետ կապերի և լրատվության վարչությունից էլ փոխանցեցին, որ հունիսի 27-ին բնակչից դիմում են ստացել, նյութեր են նախապատրաստվում:
Նարեկ Կիրակոսյան
