Նախագահականը Արմեն Սարգսյանի կողմից ՍԴ-ի մասին օրենքը չստորագրելու վերաբերյալ լրացուցիչ մեկնաբանություններ չունի

ՀՀ նախագահ Արմեն Սարգսյանը հունիսի 30-ին Ազգային ժողովի նախագահ Արարատ Միրզոյանին տեղեկացրել էր, որ «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին օրենքը՝ հարակից օրենքով, իր կողմից չեն ստորագրվելու: Այս մասին հայտնել էին նախագահի աշխատակազմի լրատվական վարչությունից և այլ մանրամասներ չէին ներկայացրել, թե ինչ հիմնավորմամբ է նախագահը նման որոշում կայացրել:

Factor.am-ը երեկ դիմեց նախագահի աշխատակազմ՝ լրացուցիչ պարզաբանման խնդրանքով։ Կառույցից, սակայն, գրավոր հարցում պահանջեցին, ինչը և այսօր ուղարկեցինք։

Քիչ առաջ հանրապետության նախագահի աշխատակազմի հասարակայնության հետ կապերի վարչությունից ստացանք մեր հարցման պատասխանը, որում, սակայն, ասված է. ««Սահմանադրական դատարանի մասին» սահմանադրական օրենքում փոփոխությունների և լրացումների փաթեթը հանրապետության նախագահի կողմից չստորագրելու վերաբերյալ լրացուցիչ մեկնաբանություններ չունենք»:

Հիշեցնենք՝ երեկ՝ հունիսի 30-ին, Ազգային ժողովի պատգամավորների ¼-ի նախաձեռնությամբ արտահերթ նիստ էր հրավիրվել, որտեղ քննարկվեց և ամբողջությամբ ընդունվեցին «Սահմանադրական դատարանի մասին» օրենքում կատարվող փոփոխությունները:

ԱԺ ընդունած այս փոփոխություններով լուծվեց բարձր դատարանում 12 տարի պաշտոնավարած Ալվինա Գյուլումյանի, Ֆելիքս Թոխյանի ու Հրանտ Նազարյանի կենսաթոշակի հարցը: Կամրագրվեն նաև դատավորների թափուր տեղերը։ Ըստ այս փոփոխության, առաջարկվում է ՍԴ դատավորների թափուր տեղերի առաջադրումների հերթականությունը փոխել` առաջադրում կատարելու առաջին լիազորությունը վերապահել Կառավարությանը, ապա հանրապետության նախագահին, այնուհետև Դատավորների ընդհանուր խորհրդին:

Նարեկ Կիրակոսյան