01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
ԱՄՆ-ն խստացրել է արտահանման սահմանափակումները ՌԴ-ի, Չինաստանի և Վենեսուելայի դեմ
Քաղաքականություն
30.06.2020 | 16:40
ԱՄՆ-ն խստացրել է արտահանման սահմանափակումները Ռուսաստանի, Չինաստանի և Վենեսուելայի դեմ։ Առևտրի և արդյունաբերության նախարարության արդյունաբերության և անվտանգության բյուրոյի՝ դեռևս ապրիլին հրապարակած փաստաթուղթը պաշտոնապես ուժի մեջ է մտել, գրում է ՌԻԱ Նովոստին։
Նոր կանոնները վերաբերում են ՌԴ, Չինաստան և Վենեսուելա այն ապրանքների արտահանման արտոնագրերի տրամադրմանը, որոնք կարող են օգտագործվել ռազմական նպատակներով։
Ցանկում սարքավորումների և մեքենաշինության, հեռահաղորդակցության, ծրագրային ապահովման և տեխնոլոգիաների ոլորտների մի քանի տասնյակ ապրանքներ են, ինչպես նաև սենսորներ, լազերներ և այլ սարքավորումներ։ Նման տեխնիկայի արտահանման համար այսուհետ հարկ կլինի ամերիկյան իշխանությունների հատուկ թույլտվությունը ստանալ։
Գերատեսչությունն այս որոշումը հիմնավորել է ԱՄՆ ազգային անվտանգության ռազմավարությամբ, որի համաձայն՝ Մոսկվան և Պեկինը սատարում են Վենեսուելայում բռնատիրությունը և ձգտում են ընդլայնել ռազմական կապերն ու առևտուրը ամբողջ տարածաշրջանում։
Աղբյուրը հիշեցնում է, որ 2019 թվականի սկզբին Վենեսուելայում բողոքի ակցիաներ սկսվեցին նախագահ Նիկոլաս Մադուրոյի դեմ՝ նրա երդմնակալությունից անմիջապես հետո։ Խորհրդարանի խոսնակ Խուան Գուաիդոն իրեն պետության ժամանակավոր ղեկավար հռչակեց, իսկ ԱՄՆ-ն ու որոշ եվրոպական երկրներ նրան նույնիսկ Վենեսուելայի նախագահ ճանաչեցին։
Մինչդեռ ՌԴ-ն, Չինաստանն ու մի շարք այլ պետություններ սատարեցին Մադուրոյին։
Ավելի ուշ Գուաիդոն ընդունեց երկրում պետական հեղաշրջման փորձի ձախողումը։ Այս տարվա հունվարին նա հեռացվեց Վենեսուելայի Ազգային վեհաժողովի ղեկավարի պաշտոնից։
