ՀՀԿ երիտասարդական կազմակերպության ակտիվիստները նամակներ են հանձնել ԵՄ պատվիրակությանը, ԵԱՀԿ երկրների դեսպանատներին, ՄԱԿ-ի գրասենյակին

ՀՀԿ երիտասարդական կազմակերպության տարածած հաղորդագրության համաձայն՝ այսօր առավոտյան ՀՀԿ երիտասարդական կազմակերպության հարյուրից ավել ակտիվիստներ, պահպանելով հակահամաճարակային բոլոր կանոնները, ակցիա են իրականացրել Հայաստանում Եվրոպական միության պատվիրակության գրասենյակի դիմաց։

Ակցիայի մասնակիցները նշում են, որ երկու տարի առաջ տեղի ունեցած իրադարձությունների արդյունքում իրավական պետության, օրենքի գերակայության կարգախոսներով իշխանության եկած վարչակազմի ծավալած գործունեությունը այսօր որևէ առնչություն չունի ժողովրդավարական արժեքների և իրավականության հետ: Ակցիայի շրջանակներում երիտասարդները իրավական և քաղաքական դիտակետերից իրավիճակի նկարագրություն պարունակող նամակներ են հանձնել Եվրոպական միության պատվիրակության, Միավորված ազգերի կազմակերպության, Եվրոպայի խորհրդի գրասենյակներ, ինչպես նաև Եվրոպայում անվտանգության և համագործակցության կազմակերպության անդամ երկրների շուրջ քսան դեսպաններին։

Հարցին, թե ինչո՞ւ է ակցիան մեկնարկում ԵՄ պատվիրակության գրասենյակի մոտից՝ ՀՀԿ ԵԿ ղեկավար Հայկ Մամիջանյանը պատասխանել է. «ԵՄ դեսպանը և մի շարք այլ դեսպաններ իրենց կողմնակալ հրապարակային հայտարարություններով և/կամ հրապարակային լռությամբ պատրանք են ստեղծում, թե միջազգային կառույցները դրական կարծիք ունեն մեր երկրում տեղի ունեցող հակաժողովրդավարական և հակասահմանադրական գործընթացների մասին, այնինչ՝ մի շարք մասնագիտական և քաղաքական հեղինակավոր կառույցներ՝ Եվրոպայի խորհուրդը, Վենետիկի հանձնաժողովը, Եվրոպայի ժողովրդական կուսակցությունը և այլք իրենց մտահոգություններն են հայտնել այս գործընթացների մասին։»