30.08.2026 | 00:13
Հայտնի է «Արարատ-Արմենիայի» խաղացանկը Եվրոպա լիգայում
ԱՄՆ-ն Թուրքիային կոչ է անում Սուրբ Սոֆիայի տաճարը որպես թանգարան թողնել
Մշակույթ
26.06.2020 | 21:31
Միջազգային կրոնական ազատության հարցերով ԱՄՆ դեսպան Սեմ Բրաունբեքը Թուրքիայի իշխանություններից պահանջել է Սուրբ Սոֆիային տաճարը պահպանել ներկայիս կարգավիճակով՝ որպես թանգարան։ Այս մասին գրում է Ինտերֆաքսը։
«Սուրբ Սոֆիայի տաճարը հոգևոր և մշակութային մեծ նշանակություն ունի տարբեր կրոններ դավանող աշխարհի միլիարդավոր հավատացյալների համար: Մենք կոչ ենք անում Թուրքիայի կառավարությանը՝ այն պահել որպես ՅՈՒՆԵՍԿՕ-ի Համաշխարհային ժառանգության օբյեկտ և որպես թանգարան՝ այնտեղ բոլորի համար մատչելիություն ապահովելով»,- գրել է Բրաունբեքը Թվիթերի իր միկրոբլոգում։
Ստամբուլում Սուրբ Սոֆիայի տաճարի շուրջ քննարկումները վերսկսել են մայիսի 29-ից հետո, երբ Կոստանդնուպոլսի անկման հերթական տարեդարձի օրը տաճարում ընթերցվեց Ղուրանը: Մեկ շաբաթ անց Թուրքիայի նախագահ Ռեջեփ Թայիփ Էրդողանը հանձնարարեց ուսումնասիրել Սուրբ Սոֆիան մզկիթի վերածելու հնարավորությունը:
Ավելի ուշ երկրի արդարադատության նախարար Աբդուլհամիդ Գյուլը հայտարարեց, որ կողմ է տաճարը կրկին մզկիթի վերածելուն։ Նախաձեռնությանը կողմ է արտահայտվել նաև երկրի արտգործնախարար Մևլութ Չավուշօղլուն:
Իր հերթին, Պոլսո հայոց պատրիարքն առաջարկել է, որ Սուրբ Սոֆիան աղոթատեղի դառնա ինչպես քրիստոնյաների, այնպես էլ մահմեդականների համար:
Տաճարի ապագայի հարցը հուլիսի սկզբին քննարկվելու է երկրի Պետական խորհրդի կողմից:
Նելլի Մելքոնյան
