26.04.2026 | 13:50
Պլանային ջրանջատում Սյունիքում
Սերժ Սարգսյանի խոնարհ ծառա Հրայր Թովմասյանը 5-րդ շարասյանն աջակցելու համար է մնացել ՍԴ-ում․ Ժաննա Ալեքսանյան. ՏԵՍԱՆՅՈՒԹ
Քաղաքականություն
26.06.2020 | 20:00
Factor.am-ի հարցազրույցը իրավապաշտպան Ժաննա Ալեքսանյանի հետ
– Տիկի՛ն Ալեքսանյան, ՍԴ-ի շուրջ ստեղծվել է մի իրավիճակ, երբ Արդարադատության նախարարությունը, ԱԺ-ն ընդունել են սահմանադրական փոփոխություններ, և պնդում են՝ ՍԴ-ից հեռացվել է 3 դատավոր, նախագահի պաշտոնից Հրայր Թովմասյանն է հեռացվել, և պետք է նոր դատավորներ ընտրվեն։ Մյուս կողմը՝ ՍԴ անդամները, պատասխանում են, որ իրենք հեռացված չեն, մնում են իրենց տեղերում։ Ինչպե՞ս կբնութագրեք այս դրությունը։
– Այս ամբողջ ընթացքը՝ Սահմանադրական դատարանի թնջուկը, Հրայր Թովմասյանի պահվածքի շարունակությունն է, դա 5-րդ շարասյան քաղաքականությունն է։ Տեսնում ենք՝ ինչպես են համալրվում այդ ուժերը, և սա աջակցությունն է դատավորներին։ Նրանք հասկանում են, որ իրենց թիկունքին մարդիկ կան կանգնած, և զուտ իրավական հարցի հետևում քաղաքական ենթատեքստն ակնհայտ երևում է։ Հրայր Թովմասյանին մենք ճանաչում ենք, նա միշտ ծառայել է կոնկրետ անձի, նա չի ծառայել մարդուն, պետությանը, և այդ թիմի նվիրյալն ու խոնարհ ծառան լինելով՝ փոխվել է ժամանակը, նա պետք է հեռանա։ Նա մնացել է միայն քաղաքական նպատակներից ելնելով։ Հրայր Թովմասյանը մնացել է Սահմանադրական դատարանում՝ աջակցելու 5-րդ շարասյանը։
– Հետաքրքիր է՝ իրավական պրոցեսներ պե՞տք է նախաձեռնվեն այն դատավորների նկատմամբ, որոնք փաստացի չեն ընդունում սահմանադրական փոփոխությունները։
– Նրանք պետք է գնան և ենթարկվեն օրենքին։ Նրանք իրավաբաններ են և լավ գիտեն դրա մասին, իսկ եթե չեն գնալու, հետագայում կերևա, կսկսվեն իրավական գործընթացներ, թե՝ ոչ։ Ինչպե՞ս կարող են չենթարկվել օրենքին Սահմանադրական դատարանի դատավորները, ի՞նչ պետք է անեն։ Դրան անպայման պիտի հետևի իրավական գործընթացը։
– ՍԴ անդամներին պաշտպանողներից գալիս է հետևյալ տեսակետը, որ ճիշտ է՝ Հրայր Թովմասյանը եղել է ՀՀԿ-ական, Սերժ Սարգսյանի համար պաշտոնավարումը երկարաձգող Սահմանադրություն է գրել, բայց հեղափոխություն է տեղի ունեցել, նա այսուհետ անկախ է, և պետք է թողնել, որ աշխատի իբրև անկախ դատավոր։ Ինչպե՞ս եք վերաբերվում։
– Թող մնա և աշխատի որպես դատավոր, ի՞նչ պարտադիր է, որ նա լինի Սահմանադրական դատարանի նախագահը։ Ինչի՞ դեմ է հիմա նա խոսում, թող մնա և աշխատի որպես դատավոր։ Հենց սա էլ է խոսում նրա քաղաքական նպատակների և նվիրվածության մասին իր քաղաքական թիմին։ Բայց և նույնիսկ ես չեմ մտածում, որ արժի ինքը մնար և աշխատեր, որովհետև մենք չենք տեսել օրինավոր պրոցեսներին մասնակցություն։ Հիմա այս մարդը ծառայել է Սերժ Սարգսյանին, թող հեռանա։ Թող մնա և աշխատի դատավոր, եթե այլ նպատակներ չունի։ Եվ ինչի՞ համար է այս աղմուկ-աղաղակը, բացարձակապես անհասկանալի է։
– Ձեր գնահատմամբ՝ ինչպիսի՞ քաղաքական նպատակներ է սպասարկելու Հրայր Թովմասյանը, որ հիմա այսպիսի դիմադրություն կա։
– Սահմանադրական դատարանի տիրույթում գտնվող հարցեր կան՝ նույն Ռոբերտ Քոչարյանի գործը, որոնք իրենց բնույթով քաղաքական հարցեր են։ Եվ տեսնելով, որ կուտակվում են իշխանության փոփոխություն պահանջող ուժերը, այսպիսի հայտարարություններով առաջ են գալիս մարդիկ։ Ասենք՝ Վանեցյանը մեկ տարի առաջ անհայտ մեկն էր, ո՞վ էր իրեն ճանաչում, և այս կարգի մարդիկ, որ գալիս են առաջ, փորձելու են Սահմանադրական դատարանն օգտագործել։ Օրինակ՝ ինչո՞ւ հետ վերցրին Քոչարյանի պաշտպանները դիմումները, այսպես էլ է երևում, որ նրանց նպատակներն այլ են։ Հրայր Թովմասյանն այս ընթացքում լրիվ հեղինակազրկվել է։ Հրայր Թովմասյանի մարդկային կերպարն էլ է խոցելի, երբ նա նախարար էր, հացադուլ էին հայտարարել, և նա ասել էր՝ դա սովորական բան է, ինչպես աղջիկներն ականջօղ են կրում։ Նա խոնարհաբար ծառայել է Սերժ Սարգսյանին և պետք է հեռանար։ Հրայր Թովմասյանը ոչ թե հեռացել է քաղաքականությունից, այլ մնացել է քաղաքականության մեջ և փորձում է լրացնել այն հավաքվածների շարքերը, որ կան նրա հետևում։
Հարցազրույցն ամբողջությամբ՝ տեսանյութում։
Ռոբերտ Անանյան
