20.01.2026 | 11:26
ԱԺ-ն առաջին ընթերցմամբ ընդունեց 27-37 տարեկան չծառայածներին քրեական պատասխանատվությունից ազատելու նախագիծը
COVID-19-ի բուժման համար նոր դեղամիջոց կօգտագործվի․ Deutsche Welle
26.06.2020 | 19:15
Դեղամիջոցների եվրոպական գործակալությունը (EMA) թույլատրել է ամերիկյան «Gilead» ընկերության կողմից արտադրված «Remdesivir» կոչվող դեղամիջոցի օգտագործումը COVID-19-ով հիվանդների բուժման համար։ Համապատասխան որոշում պետք է կայացնի նաև Եվրահանձնաժողովը։ Այս մասին հայտնում է Deutsche Welle-ն։
Դեղամիջոցների եվրոպական գործակալության կայքում հրապարակված պաշտոնական հայտարարության համաձայն՝ «Remdesivir» դեղամիջոցը կարելի է օգտագործել COVID-19-ով վարակված, թոքաբորբ ունեցող և լրացուցիչ թթվածին պահանջող մեծահասակների, ինչպես նաև 12 տարեկանից մեծ դեռահասների բուժման համար։
Deutsche Welle-ի փոխանցմամբ՝ դեղամիջոցն ի սկզբանե օգտագործվել է Էբոլա վարակի դեմ պայքարելու նպատակով։ Վերջերս էլ ԱՄՆ-ում այն սկսել են կիրառել COVID-19-ով ծայրահեղ ծանր հիվանդների բուժման համար։
«Remdesivir»-ի արտադրությամբ զբաղվող ամերիկյան «Gilead» ընկերության կայքում առկա են դեղամիջոցի նախնական փորձարկման արդյունքները։ Նշվում է, որ 65%-ով բարելավվել է այն հիվանդների վիճակը, որոնց բուժման ընթացքում «Remdesivir» է օգտագործվել։ Հիշեցնենք՝ վերջերս Մեծ Բրիտանիայի առողջապահական փորձագետները COVID-19-ի դեմ պայքարում փորձարկել էին դեքսամետազոնը։ Փորձարկման արդյունքում դեղամիջոցը 1/3-ով կրճատել էր ԹԱՕ սարքերին միացված հիվանդների մահացության ռիսկը, իսկ թթվածնից կախյալ հիվանդների համար՝ 1/5-ով։
Ամփոփելով նշենք, որ աշխարհում կորոնավիրուսի վարակակիրների թիվը գերազանցել է 9․7 միլիոնը։ Մահվան ընդհանուր դեպքերը 492 հազարից ավելի են։
Նելլի Մելքոնյան
