19.09.2026 | 16:22
Երևանում կանցկացվի բժշկական զբոսաշրջության գլոբալ համաժողով
Լուկաշենկոն հայտարարել է Բելառուսի ներքին գործերին և ընտրություններին արտաքին, այդ թվում՝ ՌԴ-ի միջամտության մասին
Քաղաքականություն
25.06.2020 | 20:44
Բելառուսի ներքին գործերին և նախընտրական արշավին արտաքին միջամտություն կա։ ԲԵԼՏԱ-ի փոխանցմամբ՝ այս մասին հայտարարել է Բելառուսի նախագահ Ալեքսանդր Լուկաշենկոն։
Խոսելով երկրում ընթացիկ իրադրության մասին՝ Լուկաշենկոն նշել է, որ համացանցում ակտիվորեն ֆեյքեր են տարածվում, որոնց օգնությամբ ցանկանում են վարկաբեկել իշխանությանը։ Նա հավելել է, որ դրանցից մի քանիսն իրեն ուղղակի զարմացնում են։
«Այսօր ինձ զեկուցեցին, որ իմ որդիներից մեկը Շվեյցարիայում 840 մլն դոլար ունի։ Դիվանագիտական ուղիներով այնտեղ նամակ ուղարկեք։ Ով ուզում է վերցնել այդ փողերը, թող անհապաղ վերցնի»,- ասել է Լուկաշենկոն՝ հավելելով, որ այդ կեղծ տեղեկությունները Ռուսաստանից են գալիս։
Ինչ վերաբերում է ընտրություններին, Բելառուսի գործող ղեկավարն ասել է՝ իշխանության ընդդիմախոսներն արդար ընտրություններ են պահանջում, սակայն իրենք են անազնիվ վարվում։
«Պարզ է, որ նրանց հետևում տիկնիկավարներ կան։ Նրանք և՛ մի, և՛ մյուս կողմից են։ Ե՛վ Լեհաստանից են, և՛ Ռուսաստանից։ Մենք այդ մասին նախագահ Պուտինի հետ առաջիկայում կխոսենք, բայց շատ բարդ իրադրություն է։ Ամենաժամանակակից կեղծ տեխնոլոգիաներ են օգտագործվում, մեր ընտրություններին, ներքին գործերին արտերկրից միջամտություն է կատարվում»,- հայտարարել է Ալեքսանդր Լուկաշենկոն։
Մոսկվան արդեն արձագանքել է Լուկաշենկոյի հայտարարություններին՝ հերքելով իրեն ուղղված մեղադրանքները։
«Կարելի է միանշանակ պատասխանել, որ Ռուսաստանի Դաշնությունը երբեք չի միջամտել, չի միջամտում և չի պատրաստվում միջամտել որևէ մեկի ընտրական գործընթացին, առավել ևս՝ մեր դաշնակից Բելառուսի»,- հայտարարել է ՌԴ նախագահի խոսնակ Դմիտրի Պեսկովը, գրում է DW-ն։
