Պարզվում է՝ ամիսներ շարունակ մեքենայի մեջ վարելուց նկարահանվել եմ, հիմա ինչ-որ բան են բռնել և ուզում են դրանով որոշակի ճնշում գործադրեն. Խաժակյան

Այսօր ես իմացա, որ երկու տարբեր, իրար հետ կապ չունեցող քրեական գործերով որպես վկա պետք է հարցաքննություն տամ, և այսօր ավագանու նիստի մեկնարկին ինձ քրեական վարչության ներկայացուցիչը հանձնեց ծանուցագիրը։ Այս մասին այսօր լրագրողների հետ զրույցում ասաց Երևանի ավագանու «Լույս» խմբակցության անդամ Դավիթ Խաժակյանը։

«Գործը վերաբերում է «Լույս» խմբակցությանը օրենքով ամրակցված մեքենային, որը, բնականաբար, ունի վարորդ, որն իրականացնում է մեքենայի սպասարկումը։ Վարորդին վաղ առավոտյան տնից դուրս են տարել, բերել են քրեական վարչություն, հետագայում նաև իր կնոջն են այնտեղ հրավիրել և հարցերի բնույթը և գուցե նաև այն արդյունքը, որը կակնկալեին ոստիկանության ներկայացուցիչները այն էր, որ դուրս գար, թե ինքը ֆիկտիվ գրանցված վարորդ է․ հացրել են, թե ո՞վ է փողը ստանում, ի՞նչ է անում, իմ վերաբերյալ են սկսել հարցեր տալ և այլն: Այս քրեական գործին մասին, երբ իմացա, պարզապես ծիծաղս եկավ, որովհետև իր՝ որպես աշխատակից, առնչությունները, փաստաթղթավորվում են յուրաքանչյուր ամիս, ինքը գնում է, ներկայանում է, փաստաթղթեր է ստորագրում և այլն, ուստի իր գործառույթների կատարման մասով պարզապես ծիծաղելի է այն, ինչը որ իրենք անում են»,– ասաց Խաժակյանը։

Անդրադառնալով հարուցված մյուս քրեական գործին, ավագանու ընդդիմադիր անդամն ասաց․ «Կրկին ներգրավված եմ որպես վկա։ 6-րդ վարչությունից հրավեր ստացա և, ստիպված, ավագանու նիստը թողել, եկել եմ։ Հաշվի առնելով, թե ինչ գործի մասին է խոսքը և ինչ են փորձում ինձ մեղսագրել, ես հասկանում եմ, որ այս իշխանությունները շատ լուրջ խնդրի առաջ են կանգնած, երբ ընդդիմադիր ավագանու անդամին, որն, ի դեպ, նաև ԵԽ Տեղական և տարածքային իշխանությունների կոնգրեսի անդամ է՝ Հայաստանից պատվիրակ, վարորդին տարել են և ասում են՝ ի՞նչ հաճախականությամբ ես գնում աշխատանքի, ո՞վ է վարում։ Պարզվում է՝ ամիսներ շարունակ մեքենայի մեջ, վարելուց նկարահանվել եմ, որքան հասկանում եմ՝ նաև ձայնագրել էր խոսակցությունները, հիմա ինչ-որ բան են բռնել և ուզում են դրանով որոշակի ճնշում գործադրեն»։