«Օրինագծի փոփոխությունները միտված են հանդարտեցնելու հակընդդեմ բողոքները, հիստերիան»․ իրավապաշտպան

«Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի նախագիծը լրամշակումից հետո փոխել է իր էությունը։ Նման տեսակետ է հայտնում «Ընդդեմ կանանց նկատմամբ բռնության» կոալիցիայի ներկայացուցիչ, իրավապաշտպան Զարուհի Հովհաննիսյանը։

Նախագիծը կոչվում է ոչ թե «ընտանեկան բռնության կանխարգելման» այլ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին օրենքի նախագիծ»։

«Լրամշակված տարբերակն ունի խնդրահարույց դրույթներ, և ընդհանուր փիլիսոփայության տեսանկյունից այն փոխվել է՝ ընտանեկան բռնություն վերապրած անձի պաշտպանությունից վերածվելով ընտանիքում խաղաղության, համերաշխության մթնոլորտի վերականգնման։ Իսկ սա իրավականորեն ձևակերպելն անհնար է»,- ասում է իրավապաշտպանը։

Նախագծում տեղ է գտել այնպիսի եզրույթ, ինչպիսին է «ավանդական արժեքի ամրապնդումը»: «Նման մոտեցումը դուրս է իրավական որոշակիությունից, դա մեր կողմից որակվում է որպես ոչ մասնագիտական, քանի որ թուլացնում է օրինագծի էությունը։ Արդյո՞ք մենք դիտարկում ենք այս փաստաթուղթը՝ որպես մարդու իրավունքների պաշտպանության փատաթուղթ, թե՞ որպես ավանդական արժեքի ամրապնդման կամ ընտանիքում համերաշխության մթնոլորտի վերականգնման փաստաթուղթ»,- շեշտում է մեր զրուցակիցը։

Նա նկատում է, որ լրամշակումից հետո փորձ արվեց բավարարել այն անձանց պահանջները, որոնք խոսում էին ավանդական ընտանիքի պահպանման մասին և մտավախություն ունեին, որ օրինագիծը կարող խաթարել այդ պրոցեսը․ «Այո, հագուրդ տրվեցին հասարակական տրամադրություններին, փոփոխություները միտված են հանդարտեցնելու հիստերիան, հակընդդեմ բողոքները»։

Իրավապաշտպանը տեղեկացնում է, որ իրենց դիտարկումներն ուղարկել են միջազգային կազմակերպությունների․ «Կարծում եմ՝ այդ քայլը ինչ-որ փուլում կտա իր արդյունքը»։

Մանրամասները՝ տեսանյութում։

Աննա Բաբաջանյան