Արթուր Վանեցյանի ճեպազրույցը՝ ՍԴ-ի, գաղտնալսման գործի և Ծառուկյանի մասին. ՈԻՂԻՂ

Factor.am-ի ճեպազրույցը «Հայրենիք» կուսակցության ղեկավար Արթուր Վանեցյանի հետ

– Պարո՛ն Վանեցյան,  Ձեր քաղաքական ուժը «Բարգավաճ Հայաստանի», ՀՅԴ-ի և այլ կուսակցությունների հետ պետք է հուշագիր ստորագրեր, որը, սակայն,  չստորագրվեց։ Ինչի՞ շուրջ չկարողացաք համաձայնության գալ։

– Ես ի սկզբանե համաձայն չեմ այդ հարցի ձևակերպման հետ, որովհետև հուշագիր ստորագրելու հստակ օրեր, ժամկետ կամ, առհասարակ, հուշագրի ստորագրման փաստը շրջանառության մեջ է դրվել լրատվամիջոցների կողմից։ Որևէ քաղաքական ուժ չի հաստատել, բայց նաև չի էլ հերքել հուշագիր ստորագրելու հանգամանքը։ Դա քաղաքական գործընթաց է, քաղաքական կոնսուլտացիաներ մշտապես իրականացվում են բոլոր քաղաքական ուժերի միջև, և ես առիթ ունեցել եմ բազմիցս հայտարարելու, որ, այո՛, ակտիվ շփումների մեջ ենք մեր գործընկերների հետ՝ մեզ բոլորիս հուզող հարցերի շուրջ համախմբվելու և միասնական ճակատով հանդես գալու հարցում։ Որևէ բան մեզ չի խանգարել այդ համագործակցության համար, բայց այս պահին դեռևս ընթանում են մեր քաղաքական հանդիպումները, և երբ կլինի հստակ որոշում՝ համագործակցության, ձևաչափի և մասնակիցների, անմիջապես հանրությունը կտեղեկանա այդ մասին։

– Գագիկ Ծառուկյանի խափանման միջոցի քննարկման ժամանակ, երբ եկել էիք դատարանի բակ, ասացիք՝ ԱԱԾ-ին քաղաքական պատվեր է իջեցվել այդ գործով։ Բայց դրանից հետո Գագիկ Ծառուկյանը, ինչպես տեսանք, չկալանավորվեց։ Սա ինչի՞ հետ եք կապում և, ինչ եք կարծում, ի՞նչ փոխվեց։

– Իմ գնահատականը նույնն է, որ Գագիկ Ծառուկյանի նկատմամբ իրականացվող քրեաիրավական գործընթացի անվան տակ իրականացվում է քաղաքական հետապնդում։ Գագիկ Ծառուկյանի նկատմամբ այդ հետապնդումը սկսվեց անմիջապես այն բանից հետո, երբ նա քննադատության ենթարկեց իշխող ուժին, Կառավարությանը, հանդես եկավ Կառավարության 100 տոկոսի փոփոխության պահանջով։ Ինչո՞ւ չկալանավորվեց՝ շատ պարզ պատճառ կա․ երբ ես իմ մտահոգությունը հայտնեցի իրավապահ համակարգում տեղի ունեցող նշանակումների մասին, տվեցի շատ խիստ գնահատականներ այդ նշանակումների հետ կապված։ Սա այն իրավիճակն է, որ մեր իրավապահները, առանց հստակ հիմքեր ունենալու, որով կկարողանան մարդուն մեղադրել և պատասխանատվության ենթարկել, գնում են քաղաքական պատվերի կատարման և արդյունքում չեն կարողանում դատարանում ուղղակի նվազագույն մեղադրանքի ծավալը ներկայացնել, որ դատարանը կարողանա խափանման միջոց ընտրել կալանավորումը։ Նույն Գագիկ Ծառուկյանի հետ կապված, եթե տեսաք, դաշտում եղավ մանիպուլյատիվ բնույթի տեղեկությունների տարածում։ Երկու-երեք օր ամբողջ քարոզչամեքենան զբաղված էր Գագիկ Ծառուկյանի տունը, ունեցվածքը ցույց տալով, խոսվում էր պետությանը 40 մլրդ դրամի վնաս հասցնելու մասին, այնինչ մենք տեսանք, որ մեղադրանքում որևէ խոսք դրա մասին չեղավ։ Գագիկ Ծառուկյանին ներկայացվեց մեղադրանք ինչ-որ թղթի հիման վրա՝ անստորագիր ինչ-որ թուղթ էր, որի իրական լինելը իշխանությունները չկարողացան ապացուցել, իսկ որի կեղծ լինելը, համենայն դեպս՝ Գագիկ Ծառուկյանը և նրա փաստաբանական թիմը, այս պահին կարողացել են ապացուցել։

– Անդրադառնանք Սահմանադրական դատարանի շուրջ կատարվողին։ Տեսնում ենք՝ այս օրերին բուռն քննարկումներ են տեղի ունենում, ի վերջո՝ ԱԺ-ն ընդունեց ՍԴ երեք անդամներին հեռացնելու նախագիծը։ Ձեր գնահատականը ո՞րն է։

– Այն, ինչ կատարվեց Ազգային ժողովում երեկ, դա սահմանադրական կարգի տապալում էր, սահմանադրական հեղաշրջում, որն իրականացվեց գործող իշխանությունների կողմից և, ցավոք, այսօր դրա արդյունքում մեր պետության իրավական անվտանգությունը դրված է լուրջ վտանգի տակ։ Ես չգիտեմ, թե որոնք են լինելու հետագա անելիքները, որ այս դժվար իրավիճակից դուրս գանք։ Կարծում եմ, որ բոլոր կարող ուժերը պետք է համախմբվեն այդ հարցի շուրջ և պետությունը բերեն հետ՝ իրավական հարթություն, որովհետև այն, ինչ կատարվում է այսօր մեր երկրում, հստակ տանում է բռնապետության հաստատմանը և մի անձի կառավարման։

– Պարո՛ն Վանեցյան, մի առիթով ասել էիք, թե Ձեր հրաժարականից հետո Հրայր Թովմասյանի շուրջ օղակը սեղմվեց, այդ ակտիվ իրադարձությունները տեղի ունեցան, Հրայր Թովմասյանն էլ իր հերթին ասաց, որ Դուք ասելու շատ բան ունեք։ Հիմա կարո՞ղ եք ասել՝ ի՞նչ նկատի ուներ Հրայր Թովմասյանը, և ի՞նչ հանձնարարական էիք ստացել, որը չկատարեցիք և ինչո՞ւ։

– Ես բազմիցս նշել եմ, որ երբեք չեմ խոսելու իմ՝ ԱԱԾ տնօրեն եղած ժամանակահատվածում ստացված հանձնարարությունների կատարման կամ չկատարման գործընթացի վերաբերյալ, որովհետև դա ուղղակի կոռեկտ չէ։

– Հրայր Թովմասյանի ասածը, թե Դուք ասելու շատ բան ունեք, և՞ս դրան է վերաբերում։

– Գիտեք՝ ես ասելու բան ցանկացած հարցի շուրջ կարող եմ ունենալ, բայց չեմ ուզում անդրադառնալ հստակ Հրայր Թովմասյանի ասածին։ Կարող եմ միայն մեկ բան ասել, որ իմ պաշտոնավարման ընթացքում ԱԱԾ-ն քաղաքական պատվեր չի կատարել և այլախոհներ չի որոնել այն մարդկանց շրջանում, որոնք ունեն տարբերվող կարծիք իշխանություններից։

– Կրկին Ձեր հայտարարություններից պիտի մեջբերեմ։ Դուք ասել էիք, թե ռուսական ազդեցություն հայաստանյան ԱԱԾ-ի վրա երբեք չի եղել, ընդդիմախոսներն էլ օրինակ էին բերում, որ Դուք շրջում էիք ռուսական համարանիշով մեքենայով։

– Առնվազն շատ տարակուսելի է, որ ռուսական համարներով մեքենան վերագրվի ռուսական ազդեցությանը, այն էլ՝ մի ամբողջ պետական կառույցի վրա։ Ես նորից կրկնում և պնդում եմ, որ Հայաստանի ԱԱԾ-ի վրա երբևիցե ռուսական կամ այլ երկրի ազդեցություն չի եղել։ Մենք ունենք, այո՛, գործընկերային հարաբերություններ ՌԴ-ի, ինչպես նաև այլ երկրների հատուկ ծառայությունների հետ, որոնք հստակ սահմանված են պայմանագրերով, և այդ պայմանագրերի շրջանակներում մեր աշխատանքներն իրականացվում են։ Ռուսական համարանիշը, ես առիթ ունեցել եմ ասելու, նորից կրկնեմ․ մեքենան գնվել է Ռուսաստանում, եղբորս կողմից, բերվել է Հայաստան, և առիթ չի եղել մտածելու փոփոխության մասին, և դա էլի ինչ-որ շրջանակների կողմից շրջանառության մեջ դրված կեղծ պնդում է, թե ռուսական համարներն ինչ-որ կողմնորոշման մասին են խոսում։

– Գաղտնալսումից էլ հատված էին հրապարակել, երբ Յուրի Խաչատուրովի մասին էիք խոսում, ասում էիք՝ «ռուսների հետ հազիվ եմ բարիշել, կալանավորենք, լավ չի լինի»։ Սա ինչպե՞ս կմեկնաբանեք, չի՞ խոսում ազդեցության մասին։

– Ո՛չ, դա ազդեցության մասին չի խոսում։ Հայաստանը, շատ լավ գիտեք, որ ՌԴ-ի և մնացած այլ երկրների հետ գտնվում է միևնույն կառույցներում, մեկը՝ անվտանգության, մյուսը՝ տնտեսական, այսինքն՝ ՀԱՊԿ-ում և ԵՏՄ-ում։ Եվ շատ զարմանալի կլիներ, որ մենք ռուսական կողմի հետ ունենայինք ոչ նորմալ հարաբերություններ։ ՌԴ-ն մեր բնական դաշնակիցն է, ՌԴ-ի հետ հարաբերությունները ես շատ կարևորում եմ, կարևորում եմ նաև Հայաստանի լավ հարաբերությունները մյուս երկրների հետ։ Իմ կարծիքով՝ Հայաստանը պետք է ունենա բառի բուն իմաստով փայլուն հարաբերություններ Վրաստանի և Իրանի հետ, պետք է ունենա լավ հարաբերություններ ԵՄ երկրների, ԱՄՆ-ի, Չինաստանի, Հնդկաստանի հետ․․․ Կուսակցության համագումարում իմ ելույթում մանրամասն անդրադարձել եմ այդ հարցին։

– Պարո՛ն Վանեցյան, «Իմ քայլից» ասում են, որ ԱԱԾ տնօրենի պաշտոնը թողնելուց և քաղաքականություն մտնելուց առաջ պետք է հիշեիք, որ ԱԱԾ տնօրենի պաշտոնում ձախողել եք՝ հղում անելով նրան, թե գաղտնալսվեցիք և դրանից հետո մեկ տարի շարունակ չկարողացաք բացահայտել, թե ով էր գաղտնալսողը։ Ինչպե՞ս կարձագանքեք սրան։

– Չգիտեմ անգամ՝ ո՞վ է նման գնահատականներ տվել։ Ինձ օրերս փորձում էին բացատրել, թե ով է նման բան ասել, ճիշտն ասած՝ այդպես էլ չհասկացա՝ ում մասին է խոսքը։ Փառք Աստծո, որ ՔԿ նախագահ Հայկ Գրիգորյանն Ազգային ժողովում լրագրողների հետ զրույցում ասաց, որ գաղտնալսման գործը վաղուց բացահայտված է։ Ուղղակի, նորից եմ կրկնում, ես չեմ այն մարդն այսօր, որը դրա մասին պետք է մանրամասներ հայտնի։ Ինչ վերաբերում է առհասարակ գաղտնալսման փաստին, ես առիթ ունեցել եմ խոսելու, որ ինքնին գաղտնալսման փաստը ինձ համար շատ ծանր է եղել, բայց նաև պետք է հասկանանք, որ ապրում ենք ժամանակակից աշխարհում, և ես չեմ այն միակ բարձրաստիճան պաշտոնյան, որը հայտնվել է նման իրավիճակում։ Շատ ավելի հզոր երկրների՝ ավելի բարձր պաշտոններ զբաղեցնող անձինք մշտապես հայտնվում են նման իրադարձության մեջ։ Բայց դա որևէ կերպ չի փոխում իմ վերաբերմունքը, որ, այո՛, գաղտնալսման փաստը շատ ցավալի է, և պետք է չլիներ։

– Դուք ասել էիք, որ պատվիրատուին գիտեք։ Հիմա այլևս ԱԱԾ տնօրեն չեք, կաշկանդող բան չունեք, կարո՞ղ եք հիմա գոնե փակագծեր բացել։

– Ո՛չ, չեմ կարող, որովհետև քրեական գործի վարույթն իրականացրել է Քննչական կոմիտեն, խնդրում եմ՝ այդ հարցերով դիմեք ՔԿ-ին։

Լիլիթ Շաբոյան