Պատգամավորն իր կարծիքի կամ քվեարկության համար պատասխանատվության չի ենթարկվում. Մակունց. ՏԵՍԱՆՅՈՒԹ

Ցանկացած առիթով, երբ փորձում ենք Սահմանադրական դատարանի շուրջ ստեղծված խնդիրների թնջուկը բացել և հաղթահարել, ընդդիմությունը դա որակում է որպես հակապետական քայլ: Այս մասին այսօր խորհրդարանում՝ լրագրողների հետ ճեպազրույցում, հայտարարեց ԱԺ «Իմ քայլը» խմբակցության ղեկավար Լիլիթ Մակունցը:

Խմբակցության ղեկավարը հիշեցնում է՝ երբ հարցը դրվում էր հանրաքվեի, նույն որակումներն էին հնչում, և կարծիք կար, թե լավագույն տարբերակը ԱԺ-ում քննարկելը և որոշում կայացնելն է: «Շատ ուրախ կլինեինք, որպեսզի ընդդիմությունը ներկա գտնվեր նիստին և հնչեցներ իր տեսակետը, որպեսզի բոլորս հասկանայինք՝ այս իրավիճակը հաղթահարելու հարցում ընդդիմությունն ինչ է մտածում»:

Ինչ վերաբերում է հարցին, թե Վենետիկի հանձնաժողովը ափսոսանք է հայտնել, որ իրենց առաջարկությունները չեն ընդունվել, Մակունցն ասաց. «Վենետիկի հանձնաժողովը, դրական գնահատելով և դրական համարելով այն մոտեցումները, որ անհրաժեշտ են լուծումներ և այն տարբերակով, որը առաջարկվել է, կարծում է, որ պետք է հաշվի առնվեր նաև իրենց այն առաջարկը, որը նախատեսում էր անցումային փուլ և ափսոսանք է հայտնել, որ այդ անցումային փուլի հատվածը չենք ներառել նախագծում»:

Իսկ թե ինչու չեն ներառել նախագծում, Մակունցը նշեց, որ Վենետիկի հանձնաժողովի կարծիքը խորհրդատվական է և պարտադիր բնույթ չի կրում. «Այնտեղ նաև նշվում է, որ ՀՀ իշխանություններն, իրավիճակը գնահատելով, պետք է որոշում կայացնեն անցումային փուլի առումով: 2018 թվականից հետո, երբ ՍԴ-ն նախագահ ունեցավ, անցումային փուլը սկսված է և 1.5 տարի անցել է այդ ժամանակահատվածից»:

Ինչ վերաբերում է ընդդիմադիրների դիտարկումներին, թե այս օրինագծին որևէ կերպ առնչվող պատգամավորները հետագայում իրավական պատասխանատվության են ենթարկվելու՝ Մակունցը նշեց. «Պատգամավորն իր կարծիքի կամ քվեարկության համար պատասխանատվության չի ենթարկվում»:

Մանրամասները՝ տեսանյութում:

Մերի Մարտիրոսյան