Ռոբերտ Քոչարյանի գրավի գումարը տրամադրել են ռուսաստանցի գործարարները․ ՌԲԿ

ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի ազատ արձակման համար սահմանված 2 մլրդ դրամ (4.1 մլն դոլար) գրավի գումարը տվել են ռուսաստանցի գործարարները։ ՌԲԿ-ին այս մասին ասել է նախկին նախագահի շրջապատին մոտ կանգնած աղբյուրը։

Նախկին նախագահի գրասենյակի ղեկավար Վիկտոր Սողոմոնյանն էլ ՌԲԿ-ին ասել է, որ գրավի գումարը վճարել են Սամվել Կարապետյանը («Տաշիր» ընկերությունների խումբ), Սերգեյ Համբարձումյանը («Մոնարխ» ընկերությունների խումբ), Գենադի Ստեփանյանը (ռուսաստանցի գործարար և մեկենաս)։

Մնացյալ գումարը հատկացրել է «Սիստեմա» ընկերությունը, որտեղ Ռոբերտ Քոչարյանը 2009 թվականից տնօրենների խորհրդի անդամ է, ընկերության անկախ տնօրենը։ Նշվում է, որ գրավի գումարը տրամադրել է հենց ընկերությունը՝ որպես իրավաբանական անձ։

Վերաքննիչ դատարանը, հիշեցնենք, դատավոր Արսեն Նիկողոսյանի նախագահությամբ հունիսի 18-ին հրապարակեց որոշումը, որի համաձայն՝ ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանը գրավի դիմաց ազատ արձակվեց կալանքից։ Որպես գրավ Քոչարյանը դատարանին կվճարի 2 միլիարդ դրամ։

Այսօր ավելի վաղ էլ երկրորդ նախագահի գրասենյակից տեղեկացրել էին, որ Վերաքննիչ քրեական դատարանի որոշմամբ նախատեսված գրավի վճարումից և օրենքով սահմանված բոլոր գործընթացներն ավարտելուց հետո հունիսի 19-ի երեկոյան Ռոբերտ Քոչարյանի խափանման միջոց կալանավորումը վերացվել է։ Նա վերադարձել է տուն, սակայն շարունակելու է վերականգնողական բուժումը «Իզմիրլյան» բժշկական կենտրոնում՝ բժիշկների սահմանած ժամանակացույցին համապատասխան։