Փաստահավաք հանձնաժողովը կարող է նաև փոխհատուցումների վերաբերյալ առաջարկություններ անել. Դադունց. ՏԵՍԱՆՅՈՒԹ

Արդյո՞ք ձևավորվելիք Փաստահավաք հանձնաժողովը բացահայտված փաստերի հիման վրա փոխհատուցման հարց բարձրացնելու է։ Այս հարցը «Պետական կարիքների զոհեր» ՀԿ ղեկավար Սեդրակ Բաղդասարյանն ուղղեց ԱՆ «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Դադունցը «Փաստահավաք հանձնաժողով․ արդարության և ճշմարտության վերականգնման հնարավորություն» թեմայով քննարկման ընթացքում։

«Ո՞վ պետք է լուծի փոխհատուցման հարցերը: Բուզանդի 9 հասցեի բնակիչների՝ Թունյանների հարցը ՄԻԵԴ վճռով չլուծվեց, իսկ ինչ-որ հանձնաժողով պետք է ստեղծվի, չգիտեմ՝ ով քննի ու ինչ-որ եզրակացության գա, իսկ փոխհատուցո՞ւմը: Արդեն 15 տարի է՝ փողոցում ենք գտնվում և վարձով ապրում: Իմ երեխաների մանկությունը, այն 15 տարվա զրկանքնը, որ տեսանք, ո՞վ պետք է փոխհատուցի»,- նշեց Բաղդասարյանը՝ ընդգծելով, որ սա ոչ թե ճշմարտության բացահայտման խնդիր է, այլ արդարության վերականգնման։

ԱՆ «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Դադունցը նշեց, որ նախագծով նախատեսված է՝ զեկույցում կամ դրանից դուրս հանձնաժողովը կարող է համապատասխան բարեփոխումների և փոխհատուցումների մասով առաջարկություններ ներկայացնել Կառավարությանը և իրավասու մարմիններին։

Հիշեցնենք, որ ՀՀ արդարադատության նախարարությունը մշակել և հանրային քննարկման է ներկայացրել «Հայաստանի Հանրապետության փաստահավաք հանձնաժողովի մասին» ՀՀ օրենքի և հարակից օրենքների նախագիծը։ Այս հանձնաժողովն օժտված է լինելու 1991-2018 թվականների ընթացքում Հայաստանի Հանրապետությունում տեղի ունեցած մարդու իրավունքների զանգվածային և պարբերական խախտումների դեպքերը և դրանց պատճառներն ուսումնասիրելու, դրանց վերաբերյալ տեղեկություններ հավաքագրելու և դրանց կրկնության բացառմանն ուղղված առաջարկություններով հանդես գալու իրավասությամբ:

Մանրամասները՝ տեսանյութում։