29.04.2026 | 22:45
ՀՀ տարածքում ավտոճանապարհները հիմնականում անցանելի են
Արմեն Գևորգյանի գործով Վճռաբեկը վարույթ չի ընդունել գլխավոր դատախազի բողոքը
Հասարակություն
18.06.2020 | 21:44
Վճռաբեկ դատարանը մերժել է վարույթ ընդունել ՀՀ գլխավոր դատախազ Արթուր Դավթյանի բողոքը նախկին փոխվարչապետ Արմեն Գևորգյանի գործով։ Factor.am-ի հետ զրույցում այս մասին ասաց Գևորգյանի փաստաբան Էրիկ Ալեքսանյանը։
Նրա խոսքով՝ սա նշանակում է, որ ՀՔԾ-ն պարտավոր է նյութեր նախապատրաստել և պարզել՝ արդյոք նախկին փոխվարչապետ, Մարտի 1-ի գործով ամբաստանյալ Արմեն Գևորգյանին սահմանը հատելն արգելած Ոստիկանության ծառայողների գործողություններում առկա են հանցագործության հատկանիշներ։
Փաստաբան Էրիկ Ալեքսանյանը, հիշեցնենք, Արմեն Գևորգյանին ՀՀ սահմանը հատելը թույլ չտալու կապակցությամբ հաղորդում էր ներկայացրել ՀՀ գլխավոր դատախազին՝ խնդրելով իրավական գնահատական տալ Ոստիկանության քրեական հետախուզության գլխավոր վարչության գործողություններին, իսկ քրգործ հարուցելու առիթի օրինականության և հիմքերի բավարար լինելու դեպքում՝ քրգործ հարուցել:
Գլխավոր դատախազությունն ու Երևանի ընդհանուր իրավասության դատարանը, սակայն, համարել էին, որ Էրիկ Ալեքսանյանի կողմից ներկայացված հաղորդումը հանցագործության հատկանիշների մասին կոնկրետ տվյալներ չի պարունակում: Փաստաբանը վերաքննիչ բողոք էր ներկայացրել, որը փետրվարի 18-ին բավարարվել էր՝ վարույթն իրականացնող մարմնին պարտավորեցնելով վերացնել Արմեն Գևորգյանի իրավունքների խախտումը։
«Այլ կերպ ասած, ՀՔԾ-ն պետք է պարզի՝ քրեական գործ հարուցելու հիմք կա՞, թե՞ ոչ, և որոշում կայացնի քրեական գործ հարուցելու կամ քրեական գործ հարուցելը մերժելու մասին»,- նշեց Էրիկ Ալեքսանյանը։
Լիլիթ Շաբոյան
