Ուզում են ցույց տալ, թե ԲՀԿ-ի նավը խորտակվում է․ ԲՀԿ-ական պատգամավորները չեն հավատում ջրատարում «լողացող» կուսակցական անդամատոմսերի տեսանյութի իսկությանը

Ֆեյսբուք սոցիալական ցանցում տարածվել է մի տեսանյութ, որտեղ երևում է, թե ինչպես են ջրատարում (հայտնի չէ, թե կոնկրետ որ) մեծ թվով կուսակցական անդամատոմսեր «լողում»։ Տեսանյութը նկարահանած երիտասարդները ջրից դուրս են հանում տասնյակ անդամատոմսեր, որոնք, ըստ տարածված տեսանյութի, ԲՀԿ անդամատոմսեր են։

Տեսանյութի առնչությամբ փորձեցինք մեկնաբանություն ստանալ «Բարգավաճ Հայաստան» խմբակցության պատգամավորներից։ Արման Աբովյանը մեզ հետ զրույցում նշեց․«Քանի որ գնում է կատաղի տեղեկատվական պատերազմ, ամեն ապատեղեկատվություն, ամեն սադրանք սպասում ենք։ Բայց կոնկրետ այդ դրվագի հետ կապված տեղեկություն չունեմ»։

Factor.am-ի հարցին՝ արդյո՞ք կարծում է, որ տեսանյութը իրականությանը չի համապատասխանում, Արման Աբովյանը պատասխանեց․ «Իհարկե»։

ԲՀԿ-ական մեկ այլ պատգամավոր՝ Գևորգ Պետրոսյանը տեսանյութի առնչությամբ ասաց, որ չի հավատում, թե նման բան կա։ «Դա, երևի, ինչ-որ մեկի ձեռքի գործն է՝ ցույց տալու համար, որ իբր արդեն «Բարգավաճ Հայաստան»-ի նավը խորտակվում է և, այսպես ասած, առնետավազք է տեղի ունենում։ Դա, երևի, այդպիսի իմիտացիա անելու նպատակով է ստեղծվել։ Հավաստիացած եմ, որ դա կեղծիք է, բայց եթե անգամ դա ճշմարտություն է, հիմա ով որ իր անդամատոմսը հանձնում է կամ դուրս է գալիս կուսակցությունից, դա նրա սահմանադրական իրավունքն է, բայց այդ եղանակով դուրս գալ կուսակցությունից․․․անդամատոմսը գետը նետելուց հետո այդ մարդը պետք է իրեն աղբամանը նետի, որովհետև դա հարգանք չի պետականության նկատմամբ։ Դու կարող ես կուսակցության հետ անհամաձայնություն ուեննալ, դուրս գալ, բայց անդամատոմսը գետը նետել, դա նկարահանել, դա աննորմալ մոտեցում է»։

Պատգամավորն ընդգծեց, որ ավելի շատ հակված է կարծել, թե տեսանյութը կեղծ է։ «Ինձ որևէ տեղեկատվություն չի հասել, թե կուսակցությունից արտահոսք կա, մարդիկ իրենց տեղերում են, իրենց կուսակցական գործունեությունն իրականացնում են»,- ասաց Գևորգ Պետրոսյանը։

Factor.am-ը փորձում է կապ հաստատել նաև տեսանյութը հրապարակած օգտատեր Ռոման Բաղդասարյանի հետ՝ պարզելու, թե որտեղ և երբ է նկարահանվել այս տեսանյութը։

Նելլի Մելքոնյան