12.12.2024 | 22:21
Թրամփը համաձայն չէ «հարյուրավոր մղոններ Ռուսաստանի խորքերի» ուղղությամբ հրթիռներ արձակելուն
Արտակարգ դրության անընդհատ երկարացումը, հավաքների ազատության սահմանափակումը բողոքի ցանկացած դրսևորում լռեցնելու նպատակ ունի․ Ավետիք Իշխանյան
Հասարակություն
12.06.2020 | 15:41
Խաղաղ հավաքների մասին օրենքի համաձայն՝ խաղաղ հավաք է համարվում մեկից ավելի անձանց հավաքը, իսկ Ռուբեն Մելիքյանը միայնակ ակցիա էր անցկացնում։ Factor.am-ի հետ զրույցում մեկնաբանելով ԱԺ-ի դիմաց ակցիա անցկացնող իրավապաշտպան Ռուբեն Մելիքյանին ոստիկանության կողմից բերման ենթարկելու դեպքը՝ ասաց Հելսինկյան կոմիտեի նախագահ, իրավապաշտպան Ավետիք Իշխանյանը։
«Երբ տեսա, որ նման բողոքի ակցիա է տեղի ունենում, և ոստիկանությունը պահանջում է դադարեցնել այն, որպես դիտորդ գնացի դեպքի վայր։ Ոստիկաններին զգուշացրեցի, որ Խաղաղ հավաքների մասին օրենքով՝ խաղաղ հավաք է համարվում մեկից ավելի անձանց հավաքը, իսկ այնտեղ Ռուբեն Մելիքյանը միայնակ ակցիա էր անցկացնում։ Արդյունքում ոստիկանները, կարծես, զսպվեցին, սակայն քիչ հետո, հավանաբար, նոր հրահանգ ստացան, և եկան, պահանջեցին դադարեցնել հավաքը։ Եվ, անունը դնելով ոստիկանների օրինական պահանջին չենթարկվել՝ բերման ենթարկեցին»,- ասաց Ավետիք Իշխանյանը։
Իրավապաշտպանը սա ոստիկանության կողմից անօրինականություն է որակում։ Ասում է՝ եթե նույնիսկ սա պայմանականորեն հավաք համարենք, իրավապահները չպետք է միջամտեին՝ մինչև դրա ավարտը։
«Այստեղ գալիս է հավաքների մասին մեկ այլ օրենք, որ եթե արգելված է հավաքների անցկացումը, իսկ հիմա, եթե ընդունենք, որ արտակարգ իրավիճակի պայմաններում հավաքներն արգելված են, միջազգային սկզբունք կա, Հայաստանի օրենսդրությամբ՝ նույնպես, որ եթե հավաքը խաղաղ է, ապա ոստիկանությունը միջամտելու իրավունք չունի, այլ կարող է միայն հետագայում՝ հավաքն ավարտվելուց հետո, վարչական վարույթ իրականացնել։ Այսինքն՝ տեղի է ունեցել խախտում մի քանի տեսակետից, և ոստիկանության պահանջն ապօրինի էր»,- հավելեց նա։
Ավետիք Իշխանյանն ընդգծեց նաև, որ միջազգային կառույցների կողմից տարբեր երկրներում սահմանափակումների հետ կապված կոչեր են եղել՝ զգույշ լինել խաղաղ հավաքներն ամբողջությամբ արգելելու հարցում, որովհետև մարդիկ իրենք բողոքի ձայնը բարձրացնելու իրավունքը պետք է կարողանան իրացնել։
«Այս տեսակետից մենք առաջարկություն էինք արել, որ հավաքների սահմանափակումը վերացնեն՝ պայմանով, որ հավաքները կարող են իրականացվել դիմակով և սոցիալական հեռավորությունը պահպանելով։ Որովհետև այն, ինչ կատարվում է Հայաստանում, մասնավորապես՝ ինչ-որ օրենքներ են ընդունվում, օրինակ՝ գույքահարկի, հայտարարագրերի, բանկային գաղտնիքի մասին, ընդ որում՝ առանց հանրային քննարկումների, սրանք զգայուն օրենքներ են, և հնարավոր է՝ դրանց դեմ լինեն նաև բողոքներ։ Փաստորեն, արտակարգ դրությամբ մարդկանց արգելում են իրենց կարծիքն ասել»,- հավելեց նա։
Իշխանյանի խոսքով՝ իրավապաշտպան հանրությունը պետք է բողոքի ձայն բարձրացնի, իր բնորոշմամբ, այս անօրինականությունների դեմ։
«Տպավորությունս այնպիսին է, որ Հայաստանը վերածվում է ոստիկանական պետության, և իրավապաշտպան հանրությունը պետք է իր բողոքի ձայնը բարձրացնի այս անօրինականությունների դեմ։ Արտակարգ դրության անընդհատ երկարացումը, հավաքների ազատության սահմանափակումը բողոքի ցանկացած դեպք լռեցնելու նպատակ ունի»,- եզրափակեց իրավապաշտպանը։
Թամարա Հակոբյան
