Հասարակություն
12.06.2020 | 13:23
Մարդու իրավունքների պաշտպանի հանձնարարությամբ՝ արագ արձագանքման խումբ է մեկնել ՀՀ ոստիկանության Արաբկիրի բաժին Ազգային ժողովի դիմացից քաղաքացիական ակցիաներ իրականացնող Ռուբեն Մելիքյանին և մի շարք այլ անձանց բերման ենթարկելու առնչությամբ։
«Տեղի կունենան առանձնազրույցներ բերման ենթարկված քաղաքացիների հետ, կուսումնասիրվեն նրանց բերման ենթարկելու հիմքերն ու իրավունքների ապահովման վիճակը, ինչպես նաև այդ առնչությամբ Ոստիկանությունում կազմված փաստաթղթերը»,- ասված է ՄԻՊ-ի հաղորդագրությունում:
Հիշեցնենք, որ այսօր ավելի վաղ Ոստիկանությունը բերման էր ենթարկել ԱԺ դիմաց բողոքի ակցիա իրականացնող «Իրավական ուղի» ՀԿ համանախագահ, Արցախի նախկին ՄԻՊ Ռուբեն Մելիքյանին եւ եւս 3 քաղաքացու, որոնք բողոքի ակցիա էին իրականացրել՝ պահանջելով քաղաքացիներին վերադարձնել խաղաղ հավաքներ անելու իրավունքը, որը սահմանափակված է՝ մարտի 16 ից երկրում հայտարարված եւ արդեն չորրորդ անգամ երկարաձգվող արտակարգ դրության պատճառով։
