ՊՎԾ-ն «Հանրային» հեռուստաընկերություն է մտել. ստուգումները սկսվել են Մարգարիտա Գրիգորյանի հեռանալուց հետո

Պետական վերահսկողական ծառայությունը ստուգումներ է սկսել Հանրային հեռուստաընկերությունում: Տեղեկությունը Factor.am-ին փոխանցում են «Առաջին ալիքի» հավաստի աղբյուրները:

Մեր տեղեկություններով՝ Հանրային ՀԸ-ում Պետական վերահսկողական ծառայությունը մանրակրկիտ ստուգումներ է իրականացնում արդեն մեկ ամիս:

«Հանրային» հեռուստաընկերությունում ՊՎԾ-ի կողմից ստուգումներ իրականացնելու մասին Factor.am-ի տեղեկությունը հաստատեց ՊՎԾ մամուլի խոսնակ Սեդա Աղբալյանը: «Մայիսի սկզբներին ենք սկսել ստուգումները: Ուսումնասիրում ենք ընդհանուր ծախսերը և եկամուտները: Ուսումնասիրում ենք գնումները, շինարարությունները, հեռուստաարտադրության ծախսերը, գործուղումները, աշխատավարձերը, մի խոսքով ամեն ինչ»,- ասաց Պետական վերահսկողական ծառայության մամուլի խոսնակը:

Factor.am-ի հարցին, թե ինչու են որոշել Հանրայինում ստուգումներ իրականացնել, Սեդա Աղբալյանը պատասխանեց, որ ռիսկեր են եղել. «Վեր հանված ռիսկերի հիման վրա էլ սկսել ենք ուսումնասիրությունները»:

Հիշեցնենք, որ ապրիլի 20-ին աշխատանքից ազատվել էր «Հանրային» ՀԸ-ի գործադիր տնօրեն Մարգարիտա Գրիգորյանը: Պատճառը վարչապետի ելույթի՝ եթերից դուրս մնացած կադրերի համացանցում հայտնվելն էր: ՊՎԾ խոսնակից հետաքրքրվեցինք՝ Մարգարիտա Գրիգորյանի պաշտոնանկությունը կապ ունի՞ ստուգումների հետ, քանի որ ժամանակային առումով համընկնում է։ «Մենք ռիսկեր ենք վեր հանել, դրա հիման վրա էլ սկսել ենք ստուգումները: Չեմ կարծում, որ տնօրենի հրաժարականը կապ ունի»,- ասաց նա:

Հիշեցնենք, որ «Հանրային» ՀԸ-ին տեղեկատվական, քաղաքական, տնտեսական, մանկապատանեկան և հանրության համար նշանակալի այլ տեղեկատվական բնույթի հաղորդումների արտադրությունն ու հեռարձակումն ապահովելու նպատակով պետական բյուջեից տրվել է 7 մլրդ 396 մլն 131 հազար դրամ:

Նարեկ Կիրակոսյան