Վարչապետի մակարդակով ստեղծվում է  անընդունելի մի նախադեպ, որը  հանգեցնում է ամենաթողության. Վահան Արծրունի

«ՀՀ վարչապետ Նիկոլ Փաշինյանի կողմից ֆեյսբուքյան իր էջում  քաղաքացիների անձնական տվյալների՝ լուսանկարների, տեսանյութերի հրապարակումը  ոչ միայն իրավական, այլև բարոյական նուրբ սահմանի խախտում է»,- Factor.am-ի հետ զրույցում տեսակետ հայտնեց  կոմպոզիտոր, երգիչ Վահան Արծրունին:

Ի դեպ, այսօր հայ հանրության շրջանում բուռն արձագանք ստացավ Փաշինյանի կողմից հրապարակված երիտասարդ աղջկա մի լուսանկար, որտեղ վերջինս առանց դիմակի էր և կարճ տաբատով: Վարչապետը լուսանկարը վերնագրել էր այսպես. «Անթաքույց գեղեցկություն»: Դրան  մի կողմից հետևեցին օգտատերերի քննադատությունները՝ ուղղված վարչապետին, մյուս կողմից՝ ծաղրի դրսևորումներ՝ լուսանկարի աղջկա հասցեին: Այս ամենից հետո Փաշինյանը հեռացրեց լուսանկարը և գրառում կատարեց՝ ներողություն  խնդրելով բոլոր այն հայրենակիցներից, որոնց հասցեին «իր էջում որևէ թթու խոսք է հնչել» և կոչ անելով բացառել մարդկանց մասին վիրավորական խոսքեր հնչեցնել:

Վահան Արծրունու համոզմամբ՝ այս հորդորը քաղաքացիներն արդեն չեն լսելու, որովհետև այդ «ազատության»  համար պարարտ հող ստեղծվել է հենց իր՝ Փաշինյանի կողմից. «Մարդկանց անձնական տվյալները հարապարակելու ազատություն ոչ միայն Փաշինյանն է իրեն վերագրում, այլև հորդորում է նման ազատություն ունենալ ցանկացած մեկի՝ խախտելով հանրային հարաբերությունների ստատուս-քվոն: Հանրությունը հերթական անգամ մոլորության մեջ է, չգիտի՝ ինչ է կարելի և ինչ՝ ոչ: Վարչապետի մակարդակով ստեղծվում է  անընդունելի մի նախադեպ, որը  հանգեցնում է ամենաթողության: Շատ վատ բարոյահոգեբանական մթնոլորտ է ստեղծվել, և վարչապետի քայլերին պետք է տրվի իրավական, քաղաքական և բարոյական գնահատական»:

Կոմպոզիտորի կարծիքով՝ իշխանությունը հանրությանը վերահսկելու բոլոր մեխանիզմներն ունի. ուժային կառույցներն էլ հենց դրա համար են: «Իր ֆեյսբուքյան էջին իրավախախտների լուսանկարներն ու տեսանյութերն ուղարկելու վարչապետի հորդորը ինձ հիշեցրեց 1930-ականների մթնոլորտը, որից գարշահոտություն է գալիս: Այն ժամանակ էլ կային «ազգի դավաճաններ» և «թշնամիներ», և «գործ տալով» պետք էր ի հայտ բերել  նրանց»,- եզրափակեց մեր զրուցակիցը:

Աննա Բաբաջանյան