08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
«Ախ, արա խեղդվա, թողեք, գալիս եմ». ոստիկաններն առանց դիմակի քաղաքացուն «փռում են ասֆալտին». ՏԵՍԱՆՅՈՒԹ
Հասարակություն
05.06.2020 | 13:20
Քիչ առաջ սոցիալական ցանցերում հրապարակվեց մի տեսանյութ, թե ինչպես են ոստիկանները մի քանի հոգով, ուժի գործադրմամբ ձեռնաշղթա հագցնում առանց դիմակի մի քաղաքացու։ Ընդ որում, քաղաքացին, կարծես, չի դիմադրում և մի քանի անգամ ասում է, որ պատրաստ է գնալ Ոստիկանության բաժին, բայց ոստիկանները շարունակում են իրենց բռնի գործողությունները:
«Ախ, արա խեղդվա: Թողեք, գալիս եմ, ա՜խ, գալիս եմ, ա՜խ, ձեռքս»,- ասֆալտին փռված վիճակում ասում է քաղաքացին:
Այս դեպքին ֆեյսբուքում անդրադարձել է նաև վարչապետ Նիկոլ Փաշինյանն ու արդարացրել Ոստիկանության գործողությունները. «Ոստիկանությունը ուժային կառույց է, և սահմանված կանոնների նկատմամբ բացահայտ արհամարհանք ցույց տվողների նկատմամբ, օրենքով սահմանված կարգով, կարող է և պե՛տք է ուժ կիրառի: Սա իմ պահնջն է ոստիկանությունից սա նաև հանրության պահանջն է ոստիկանությունից»:
Ոստիկանության լրատվական ծառայությունից Factor.am-ին փոխանցեցին, որ տվյալ քաղաքացին ոստիկանության ծառայողների օրինական պահանջը չկատարելու համար բերվել է բաժին, այս պահին վարչական իրավախախտման վերաբերյալ արձանագրություն է կազմվում:
Հարցին՝ ինչո՞ւ են ոստիկանները նրան «փռել ասֆալտին», երբ քաղաքացին ցանկություն է հայտնում ինքնակամ գնալ բաժին, կառույցից ասացին, որ տեսանյութը ոստիկանությունում անպայման կուսումնասիրվի:
Նարեկ Կիրակոսյան
