Քաղաքականություն
05.06.2020 | 12:14Հունիսի 4-ին ավարտվեցին Ապրիլյան պատերազմի հանգամանքներն ուսումնասիրող քննիչ հանձնաժողովի աշխատանքները։ Դրանք ընթացան կառուցողական, բայց վերջում, կարծես, մեր գործընկերները փոխեցին իրենց որոշումը և մոտեցումը։ Խորհրդարանական ճեպազրույցների ժամանակ այս մասին ասաց «Լուսավոր Հայաստան» խմբակցության քարտուղար Գևորգ Գորգիսյանը։
Պատգամավորն ասաց՝ երկու նիստ բաց են թողել, բայց հետո տեսագրությունների և ձայնագրությունների նյութերին ծանոթացել են։
«Բայց, չգիտես ինչու, պարոն Անդրանիկ Քոչարյանը, երբ միայնակ կամ «Իմ քայլը» խմբակցության այլ պատգամավորների հետ փորձում էր ամփոփել աշխատանքները՝ առանց դրանց ներգրավելու ընդդիմության որևէ ներկայացուցչի, նշեց, որ մենք այլևս հետաքրքրված չենք մասնակցելու աշխատանքներին, և նաև դրա համար մեզ չեն ներգրավել այդ պրոցեսներում։ Նշեմ, որ դա բացահայտ սուտ է, որովհետև հայտնի իրադարձություններից հետո, երբ մենք վերադարձանք մեր բնականոն աշխատանքներին, մասնակցել ենք նիստի, որի ընթացքում քննարկել ենք նաև առաջիկայում Բակո Սահակյանի հետ ունենալ զրույց։ Այդ զրույցի պլանավորման և իրականացման պրոցեսը տեղի է ունեցել առանց մեզ ներգրավելու»,- ասաց նա։
Ըստ Գորգիսյանի՝ սա միանշանակ կառուցողական և գործընկերային մոտեցում չէ, սա այն մենիշխանությունն է, որի մասին իրենք խոսում են։
«Միայն այն ժամանակ, երբ բազմաթիվ լրագրողներ ինձ հարցնում են՝ արդյո՞ք Բակո Սահակյանի հետ զրույց տեղի է ունեցել, պարոն Քոչարյանը բարեհաճում է տեղեկացնել այն հարցաշարի մասին, որը քննարկվել է պարոն Սահակյանի հետ»,- հավելեց ԼՀԿ ներկայացուցիչը։
Մանրամասները՝ տեսանյութում։
