Քաղաքականություն
04.06.2020 | 15:25
2016 թվականի ապրիլին ծավալված ռազմական գործողությունների հանգամանքներն ուսումնասիրող ԱԺ քննիչ հանձնաժողովն այսօր ավարտեց աշխատանքը։ Մեկ տարվա ընթացքում հանձնաժողովը բազմաթիվ նախկին և ներկա պաշտոնյաների հյուրընկալեց, թե՛ Արցախից և թե՛ ՀՀ-ից։
Այս տարվա սկզբին հանձնաժողովի հարցերին պատասխանեց 2016 թվականին Պաշտպանության նախարարի պաշտոնը զբաղեցրած Սեյրան Օհանյանը, որը լրագրողների հետ զրույցում հայտարարեց, որ ապրիլյանին բանակն իր խնդիրը կատարել է և ճակատագրական սխալներ չեն եղել։
Հանձնաժողով ներկայացավ Արցախի Հանրապետության ոստիկանության նախկին պետ, գեներալ-լեյտենանտ Լևոն Մնացականյանը, որը 2016-ին զբաղեցնում էր Պաշտպանության բանակի հրամանատարի պաշտոնը։ Նա շեշտեց՝ եղել են բացթողումներ։
Հանձնաժողովում քննարկման տեսաձայնագրությունը ստանալու պայմանով Ապրիլյան հանձնաժողով համաձայնեց ներկայանալ ՀՀ երրորդ նախագահ Սերժ Սարգսյանը։ Մոտ 5 ժամ տևած հարցուպատասխանից հետո Սարգսյանը լրագրողներին ասաց, որ իր գալու որոշումն արդարացված է։ Սերժ Սարգսյանը քննադատեց այն մարդկանց, որոնք խոսում են դավադիր պատերազմի մասին։ Նիստին գալու իր որոշումն ամբողջությամբ արդարացված էր։
Հանձնաժողովը հարցեր ուղղելու հնարավորություն ունեցավ նաև նախկին վարչապետ Կարեն Կարապետյանին։ Բավական կարճ՝ մոտ 1 ժամ տևած հանդիպումից հետո Կարապետյանը նախընտրեց փակագծեր չբացել, թե ինչ է ասել հանձնաժողովականներին։
ԱԳ նախկին ղեկավար Էդվարդ Նալբանդյանի հետ հանձնաժողովը խոսեց տեսակապի միջոցով, քանի որ նա գտնվում է ՌԴ-ում։ Նիստից հետո հանձնաժողովի նախագահ Անդրանիկ Քոչարյանը հայտարարեց, որ Նալբանդյանի պատասխաններից հետո Յուրի Խաչատուրովը, որը ապրիլյան իրադարձությունների ժամանակ եղել է ԶՈՒ գլխավոր շտաբի պետը, երկու օր ժամանակ ունի նիստին ներկայանալու համար։ Բայց Խաչատուրովն այդպես էլ չարձագանքեց այս խոսքերին և չներկայացավ խորհրդարան։
Ապրիլյանի վերջին զրուցակիցն Արցախի Հանրապետության նախկին նախագահ Բակո Սահակյանն էր, որի հետ հանձնաժողովը խոսեց երեկ՝ տեսակապի միջոցով։
Հանձնաժողովն այս ընթացքում կամփոփի աշխատանքը և սեպտեմբերին ապրիլյանի վերաբերյալ զեկույց կներկայացնի հանրությանը։
Մերի Մարտիրոսյան
